«Ինձ մոտ այն տպավորությունն էր, որ ՀՀԿ պատգամավորները ինչ-որ որոշում էին կայացրել, բայց այդպես էլ չհասկացան՝ դրա իմաստը որն է։ Ոչինչ չառաջարկել և կանգնել ընդամենը ասել, որ Նիկոլը չի կարող լինել վարչապետ, հարցի լուծում չէ»,- «Առաջին լրատվական»-ի հետ զրույցում նման տեսակետ հայտնեց Հայաստանի Դեմոկրատական կուսակցության նախագահ Արամ Գ. Սարգսյանը։
Նրա խոսքով՝ այդ մարդիկ կամ պատվեր են կատարում, կամ իրենք էլ չեն հասկանում, թե ինչ են անում: «Չգիտեմ՝ հույսներն ինչի՞ վրա են դրել։ Այդ 7 օրվա ընթացքում նրանք նստելու ու տերևի նման դողալու են, բայց նրանց ոչ ոք այս վիճակից չի փրկելու։ Ժողովուրդը ոտքի է կանգնած, այս մաքրման պրոցեսը պետք է ավարտվի։ Ասում են՝ խոսենք, ի՞նչ հարցեր են ձեզ հուզում, առաջարկ արեք, թող ժողովուրդը լսի ձեր առաջարկները»,- հավելեց նա։
Արամ Գ. Սարգսյանը ներկայացնում է իրենց առաջարկները. «Մեր կուսակցությունն առաջարկ արեց՝ այս շարժման ղեկավարին, ով կարողացել է ժողովրդին ոտքի կանգնեցնել, պետք է աջակցել, բայց Նիկոլ Փաշինյանն էլ իր հերթին պետք է շատ արագ փոփոխության ենթարկի բոլոր խնդրահարույց օրենքները՝ Ընտրական օրենսգիրք, Կուսակցությունների մասին օրենք, որպեսզի նորմալ ընտրություններ անցկացվեն։ Երկրորդ գաղափարը՝ Ազգային անվտանգության խորհուրդը պետք է նորից վերականգնվի որպես ինստիտուտ։ Իմ խորին համոզմամբ՝ Անվտանգության խորհրդի կազմի մեջ պետք է ընդգրկվի ոչ միայն նախագահը, այլև պետք է դառնա այդ կառույցի ղեկավարը։ Հիմա վարչապետը այլ ֆունկցիաներ ունի, պետք է տնտեսության կառավարման վրա ուշադրություն դարձվի, իսկ Անվտանգության խորհրդի ղեկավարը պետք է նախագահը լինի։ Ինձ համար դա կարևորագույն հարց է»,- ասաց մեր զրուցակիցը։
Նա շարունակում է. «Պետք է ձևավորել ժամանակավոր կառավարություն, այնտեղ պետք է ընդգրկված լինեն մի քանի քաղաքական ուժերի ներկայացուցիչներ։ Երբ այդ ողջ գործընթացն ավարտվում է, հայտարարվում են նոր ընտրություններ՝ գործող վարչապետը, որը Նիկոլ Փաշինյանն է, գնում է արձակուրդ, նրա փոխարեն լինում է ապաքաղաքական և նեյտրալ, բայց տնտեսությունից հասկացող վարչապետի պաշտոնակատար։ Ընտրություններում հաղթողները կամ կոալիցիա կազմողները, որոնք որ կարողանում են կառավարություն ձևավորել, նրանք նշանակում են իրենց վարչապետին։ Սա այն սխեման է, որը մեզ հնարավորություն է դարձնում վերահսկելի դարձնել իշխանությունը և թույլ չտալ, որ նախորդ ուժերը քաղաքական ռևանշ վերցնեն»,- ասաց Արամ Գասպարի Սարգսյանը՝ հավելելով, որ պետք է ձևավորվի քաղաքական խորհուրդ, որպեսզի պայմանավորվածություն լինի խաղի հետագա կանոնների վերաբերյալ, նաև պետք է համապատասխան փաստաթուղթ ստորագրվի։
Հետաքրքրվեցինք՝ արդյոք քվեարկության տապալման հարցում կա՞ նաև Մոսկվայի դերակատարությունը, որը միանշանակ դրական չի ընդունում Նիկոլ Փաշինյանի հնարավոր վարչապետությունը, Արամ Գասպարի Սարգսյանը պատասխանեց. «Կարո՞ղ է ԱՄՆ-ը, Եվրոպան անմասն մնան. մենք սևեռվում ենք, այնինչ պետք է ճիշտ քայլեր անենք ու հանգուցալուծում գտնենք։ Եթե մենք չենք ուզում, որ նրանք խառնվեն, ո՞նց պետք է խառնվեն։ Այստեղ ոչ թե Մոսկվայի ու Վաշինգտոնի գործոնն է, այլ այն օլիգարխների, որոնք նստած՝ տերևի նման դողում են, թե իրենց հետ ինչ է լինելու»։
