«Պետք է նկատի ունենան հրապարակում հավաքված ժողովրդի բազմությունը և նրա կառուցվածքը՝ հիմնականում երիտասարդություն է այնտեղ, իրենց այդ նախատեսած գործողությունը կնշանակի իշխանության բռնազավթման փորձ»,- «Առաջին լրատվական»-ի հետ զրույցում նման տեսակետ հայտնեց քաղաքագետ Լևոն Շիրինյանը՝ անդրադառնալով այն հարցին, թե ինչ կլինի, եթե ՀՀԿ-ն, ըստ տարածված տեղեկությունների, տապալի Նիկոլ Փաշինյանին վարչապետ ընտրելու հարցը։
Քաղաքագետը նշում է. «Գործող, Սերժ Սարգսյանի ճաշակով կարած Սահմանադրությունն ունի երեք անփոփոխ կետ։ Առաջինը՝ Սահմանադրությունը Հայաստանը հռչակում է ժողովրդավարական, սոցիալական, իրավական պետություն։ Երկրորդ՝ Հայաստանի իշխանությունը պատկանում է ժողովրդին։ Եթե այդ ժողովուրդը զանգվածորեն բողոքում է փողոցում, որևէ իշխանություն չի կարող նրա կամքին դեմ գնալ։ Երրորդ՝ ասում է Սահմանադրության բոլոր կետերը փոփոխելի են, առաջին, երկրորդը՝ ոչ։ Իսկ քաղաքական իմաստով ժողովուրդը սուվերեն ու ինքնիշխան է։ Հիմա ՀՀԿ-ն նեղանձնային, կլանային շահերից ելնելով՝ գնում է հայ ժողովրդի կամքին դեմ, հետևաբար նրանց գործողությունները ես բնութագրում եմ որպես իշխանության բռնազավթման փորձ, հետևաբար նրանք գործում են Հայաստանի Հանրապետության պետական շահերի դեմ»,- ասաց Շիրինյանը։
Մեր զրուցակիցն առաջարկում է Սահմանադրական դատարանին այս հարցը քննել ու դրան տալ սահմանադրական պատասխան՝ ընդհուպ դադարեցնել Հանրապետական խմբակցության գործունեությունը. «Իրենք նույնիսկ կորցրել են այն ընտրազանգվածը, ում կաշառք են բաժանել՝ այդ մարդիկ հրապարակում են, իրենք քաղաքական իմաստով լեգիտիմությունը կորցրել են։ Իրենց նպատակը մեկն է՝ երկիրը ներքաշել քաոսի մեջ։ Խավարի իշխանությունը ուզում է Հայաստանում հաստատել քաոսի իշխանություն։ Երրորդ հանրապետությունը մեռած է, ու վստահ պետք է լինենք, որ չորրորդը ծնվում է։ Իրենց արածը հիմա հակասահմանադրական գործունեություն է»,- նկատեց Լևոն Շիրինյանը։
Քաղաքագետը հավելում է. «Հավանաբար ռուսներից հաթաթա են ստացել, երեկվա նրանց հարցաքննությունը հենց դրա մասին էր խոսում։ Նրանք օտար կապիտալի շահերը սպասարկող ուժ են։ Արտգործնախարարի ու Արմեն Գևորգյանի այցը Կրեմլ այդ շարքից էր, բայց նրանց այնտեղ պատերի տակ են ընդունել։ Իրենք հանուն իրենց իշխանության օտարին գրգռում են Հայաստանի դեմ, բայց հաջողության չեն հասնելու»։
Լուսանկարը՝ PanARMENIAN-ի