Այս համակարգը նախորդ դարից է, այս համակարգը չարդարացված է,-«Առաջին լրատվական»-ի հետ զրույցում ասաց Երևանի Հովհաննես Թումանյանի անվան տիկնիկային թատրոնի տնօրեն Ռուբեն Բաբայանը։
«Չեմ կարծում, որ իրականում պահանջ կա դեմքը, անունը կամ անձին փոխելու, եթե այդպես է՝ շատ շուտ նոր ալիք կգա։ Սրա հետ պետք է հաշվի նստել։ Կամ պետք է շարունակենք առաջ գնալ դեպի «պայծառ անցյալ» կարգախոսով, կամ էլ պետք է փորձենք դառնալ 21-րդ դարի պետություն՝ ժամանակի թելադրած բոլոր կանոններվ, և փորձել գտնել մեր տեղը, քաղաքակիրթ տեղը։ Մեր հասարակությունը ապացուցում է, որ մեր մոտ չեն անցնում այն մոդելները, որոնք ընդունված են ասիական երկրներում։ Մենք իսկապես ուրիշ ժողովուրդ ենք, և պատկանում ենք ուրիշ քաղաքակրթության։ Կարծում եմ՝ լուծումները բանակցություններն են, բայց պետք է հասկանանք՝ ինչի շուրջ ենք բանակցում, բանակցում ենք արդյոք անարյուն և անցնցում իշխանությունը հանձնելո՞ւ, թե՞ բանակցում ենք համակարգը փոխելու վերաբերյալ»։
Ռուբեն Բաբայանը նշեց, որ բոլոր դեպքերում մենք ստորագրում ենք, որ այս համակարգը իրեն չի արդարացնում։ Նա նկատեց նաև, որ յուրաքանչյուր մարդ, որպես անձ, անփոխարինելի է, յուրաքանչյուր պաշտոնյա փոխարինելի, ինչը մեր մոտ հակառակ կերպով է արտահայտված։
«Սա արժեքային մոտեցում է։ Պետք չէ ման գալ բարի և հրաշալի ղեկավար, անիմաստ է դա, ոչ թե նման մարդիկ չկան, այլ անիմաստ է մարդու բարոյական կերպարի վրա կառուցել երկիրը, ամենաճիշտ մեթոդը դա վերահսկողությունն է»։
Խոսելով շարունակվող պայքարի մասին, Ռուբեն Բաբայանն ասաց, որ չէր ցանկանա հաշվարկների մեջ մտներ նաև ապրիլի 24-ը, բայց միևնույն ժամանակ հասկանում է, որ հնարավոր չէ խուսափել նրանից, ինչ առջևից է գալիս։
«Երբ երկար են շարունակվում նման երևույթները և չեն գտնվում լուծումները, նրանք որոշակի չափով դառնում են անկառավարելի։ Նրանք, ովքեր նախաձեռնել էին այս ամենը, դառնում են սրա կատարողները, ոչ թե տանողները։ Այսօրվա մեր վիճակը ապացուցում է, որ հաղթանակած ուժ չկա»- եզրափակեց Ռուբեն Բաբայանը։
Առավել մանրամասն՝ տեսանյութում։
