«Հուսով եմ՝ Սերժ Սարգսյանը անդառնալի կորուստներ ասելով, նկատի չունի նոր Մարտի 1, քանի որ Մարտի 1-ը միջազգային ասպարեզում Հայաստանին տվեց բռնապետության համբավ»,- «Առաջին լրատվական»-ի հետ զրույցում ասաց միջազգայնագետ, քաղաքագետ Հովհաննես Իգիթյանը՝ անդրադառնալով Սերժ Սարգսյանի այսօրվա հայտարարությանը։
Հիշեցնենք, որ իր հայտարարության մեջ Սերժ Սարգսյանը մասնավորապես ասել է. «Խորապես մտահոգված եմ ծավալվող ներքաղաքական զարգացումներով: Անդառնալի կորուստներից խուսափելու նպատակով կոչ եմ անում Ազգային ժողովի պատգամավոր Նիկոլ Փաշինյանին նստել քաղաքական երկխոսության և բանակցությունների սեղանի շուրջ: Դա պետք է անել անհապաղ»։
Իգիթյանի խոսքերով՝ Սերժ Սարգսյանը պետք է դադարի սպառնալիք պարունակող հայտարարություններին։ «Այդ զգուշացումները, ակնարկները Սերժ Սարգսյանի ու նրա շրջապատի բերանից հնչում են որպես սպառնալիք։ Դա անընդունելի է, քանի որ դա լսում են ցուցարարները, որոնց դա ոգևորում է։ Լսում են նաև ոստիկանները, որոնք դա կարող են մի պահ ընդունել որպես հրաման և գնան անընդունելի գործողությունների։ Դրանից բացի՝ այդ հայտարարությունները լսում են միջազգային կառույցները, որոնք Հայաստանի մասով սպասողական իճակում են և կախված իշխանությունների գործողություններից, վերաբերմունք պետք է արտահայտեն։ Այդ իմաստով անդառնալի բառը կարող է վատ հետևանքներ ունենալ»,- ասաց Իգիթյանը։
Անդրադառնալով Սերժ Սարգսյանի երկխոսության կոչին և մեր հարցին, թե երկխոսությունը մասնավորապես ինչի շուրջ պետք է լինի, Իգիթյանը նկատեց, որ երկրում ճգնաժամ է և ճգնաժամը այն չէ, որ երկրում 10-20 կամ 100 հազար մարդ կա։ «Երկրում քաղաքական ճգնաժամը և խորհրդարանում քաղաքական մեծամասնությոնը չի արտացոլում տարբեր շերտերի կարծիքը։ Դրանից բացի՝ ես կարծում եմ, որ Սերժ Սարգսյանին սխալ տեղեկություններ են ներկայացնում։ Անհնազանդությունը մտել է քաղաք, գյուղ, փողոց, դպրոց, տարբեր ուղղություններով է տարածվում։ Եթե Սերժ Սարգսյանին ճիշտ զեկուցեն և ասեն, որ երկրի բնակչության 70 տոկոսը իրեն դեմ է, նա պետք է հաշվի նստի դրա հետ ու երկխոսությունը այդ ուղղությամբ կառուցի։ Հարցը Փաշինյանը չէ, այլ մարդկանց անհնազանդությունը։ Եթե Նիկոլ Փաշինյանը հիմա գնա տուն, դրանից ոչ մի բան չի փոխվի, մարդիկ կշարունակեն մնալ փողոցում և մերժել Սերժ Սարգսյանին։ Վերջինս հենց սրա մասին պետք է երկխոսի, թե ինչպես Հայաստանը բերել ստաբիլության»,- ասաց Իգիթյանը՝ հավելելով, որ եթե Հայաստանը ստաբիլության բերելու համար անհրաժեշտ է, որ Սերժ Սարգսյանը հրաժարական տա վարչապետի պաշտոնից, գնա դառնա իր կուսակցության ղեկավար և ժողովրդի ու Փաշինյանի հետ մտածի, թե ով կարող է այսօր լինել վարչապետ, այ դա կարող է համարվել երկխոսություն, դրա շուրջ, դրա մասին կարելի է երկխոսել։ «Երկխոսությունը կոալիցիոն հարց չէ, որ բանակցեն երկու նախարարի՞ պորտֆել տալ, թե՞ երեք, մարզպե՞տ, թե՞ համայնքապետի պաշտոն։ Ժողովուրդը դա չի ուզում, նման խնդիր չի դնում։ Ժողովուրդն ուզում է Հայաստանի բնականոն զարգացում, և Սերժ Սարգսյանը պետք է դա ապահովի, քանի որ նա խաբել է իր ընտրողին, խոստումներ է տվել, որոնք չի կատարել»,- ընդգծեց Իգիթյանը։