«Առաջին լրատվական»-ի զրուցակիցն է «Ազատամարտիկների դաշինքի» խորհրդի անդամ, «Ապարան» ջոկատի հրամանատար Ռազմիկ Պետրոսյանը։
-Պարոն Պետրոսյան, ի՞նչ կարծիք ունեք այս օրերին փողոցում տեղի ունեցող իրադարձությունների մասին։ Իրավիճակի հանգուցալուծման ի՞նչ ելքեր եք տեսնում։
-Շատ հզոր շարժում է։ Այսօր մեր երիտասարդության պահվածքով հպարտություն եմ ապրում։ Յուրաքանչյուր գիտակից հայի համար սա մեծ հպարտություն է, մենք մեր հնարավորությունների չափով, մեր աջակցությամբ պետք է զորավիգ լինենք շարժմանը, որպեսզի բերի իրական հաղթանակի։
-Կարծում եք՝ այս անգամ հնարավոր կլինի՞ հաղթանակ գրանցել։
-Հաջողության ամենագլխավոր գրավականը երիտասարդության ակտիվությունն է, պայքարի ոչ ստանդարտ ձևը։ Սա մի մարտավարություն է, որ ոչ ոք չի կարողանում հակաքայլ կիրառել։ Ոստիկանության ցայտնոտի մեջ լինելը նրանից է, որ մարդիկ շատ քաղաքակիրթ ու բարձր մակարդակով են գործում։ Երիտասարդության մարտավարությունը ապշեցնող է։ Ես կոչ եմ անում իշխանություններին՝ հանկարծ չփորձեք ուժ կիրառել ժողովրդի նկատմամբ, այս ոգին կոտրել՝ նշանակում է բացարձակապես սպանել պետություն հասկացողությունը։ Եթե վաղվա իրենց ապագան կերտելու համար երիտասարդությունը պայքարում է՝ դրանից բարձր արժեք այլևս գոյություն չունի։
-Հնարավո՞ր է՝ ամեն դեպքում իշխանությունը գնա ուժային լուծման։
–Իրենք կամիկաձե չեն, որ նման բան անեն, իրենց գլխին չեն ուզենա փորձանք բերել։ Յուրաքանչյուր ուժի ցուցադրում հազարապատկելու է ժողովրդի քանակը։ Նրանք, ովքեր այսօր չեն մասնակցում, դիտորդի դերում են՝ վաղը ևս կմիանան։ Ես որպես զինվոր առաջին գծում կանգնած եմ, իմ հայրենիքն եմ պաշտպանում, բայց երբ տեսնեմ՝ իմ ծնողին ուժային մեթոդներով փողոցում քարշ են տալիս՝ հոգեբանորեն կկոտրվեմ։ Շատ քաղաքակիրթ է ու խաղաղ է, ոչ մի ծայրահեղ քայլ չեն անում, ոստիկանի հասցեին ոչ մի անպատիվ խոսք չեն ասում։ Հումորով մարդիկ ասում էին՝ երևի բյուջեում գումար չկա և վարչական տույժ տալու համար մարդկանց տանում են, որ 50.000 դրամ տան, նույնիսկ դա կարող է իրականություն է, այդպես չի կարելի։ Այս երիտասարդների ոգին ամենաբարձր արժենք է, այսպես է պետություն ստեղծվում։
-Ձեր մարտական ընկեր Գագիկ Մելքոնյանն ասել էր, որ համակարգում չկա երկրորդը, որը ղարաբաղյան հիմնահարցին ավելի լավ է տիրապետում, քան Սերժ Սարգսյանը, ի՞նչ կլինի ղարաբաղյան հարցում, եթե ցուցարարները հասնեն հաջողության, ու Սարգսյանը հեռանա իշխանությունից։
–Իր խոսքը վերաբերել է իրենց համակարգին։ Այսօր մեր Հայաստանում այնքան մեծ արժեք ներկայացնող մեծություններ կան, մեր ուղեղները, մեր գիտնականները դրսում են։ Մեր արժեքների գինը մենակ մենք չգիտենք։ Ոչ մեկ իր տեղում չէ, այդ տեղերը զբաղեղցրել են այն մարդիկ, որոնք ունակ չեն ու իրենց տեղում։ Իրենք կատարածու ու քծնող են։ Ես չեմ ուզում՝ մեր մատաղ սերունդն այդպես դաստիարակվի։ Այսօր մենք սովետական կեղտի ճանապարհն ենք բռնում։ Իշխանության ղեկը այսօր դարձել են այն մարդիկ, ովքեր շողոքորթելով, ցուցամոլությամբ են զբաղված, կեղծ պատմություններ գրելով կեղծ հերոսներ են ձևանում։ Արժեք ներկայացնող մարդիկ տեղ չունեն ու լքել են երկիրը։ Մենք դա պետք է կարողանանք հետ բերել։ Մենք տարիքով ավագ սերունդ ենք, մեր դրական փորձն էլ փոխանցենք երիտասարդներին, վատը չպետք է ընդօրինակեն։ Այս համակարգը պետք է ամբողջությամբ փոխվի։
-Այսինքն՝ կարո՞ղ ենք ասել՝ դուք աջակցում եք այս շարժմանը։
–Ես շարժման կողքն եմ, մնալու եմ բոլոր մարտական ընկերներիս հետ։ Մեր դաշինքը միշտ էլ ժողովրդի կողքին է եղել, մենք մեր երեխաների, մեր պայքարող ընկերների կողքին ենք։
