«Կարծիքներ կան, թե դիրքորոշումներն այնքան հակադիր են, որ երկխոսության ընդհանուր որևէ կետ չի կարող լինել, բայց ես տեսնում եմ բավական լայն դաշտ, որտեղ կարող է այդ երկխոսությունը կայանալ։ Կարծում եմ, որ երկխոսությունը կարող է արդյունք ունենալ, եթե այն կայանա կառավարության և ցուցարարների ներկայացուցիչների միջև՝ ուղղակի առանց միջնորդների։ Հայաստանում իրավիճակ է փոխվել. մենք տեսնում ենք հիանալի երիտասարդություն՝ քաղաքացիական դիրքորոշմամբ, և այս երիտասարդությանը չի կարելի ո՛չ հիասթափեցնել, ո՛չ էլ կոտրել»,- «Առաջին լրատվական»-ի հետ զրույցում հայտարարեց Դավիթ Շահնազարյանը։
Դավիթ Շահնազարյանը նշում է, որ հասարակությունում առկա է փոփոխությունների հստակ պահանջ, և այն առկա է նաև հասարակության այն շերտերում, որոնք չեն մասնակցում բողոքի ցույցերին և հանրահավաքներին։
«Եվ այստեղ հնարավորություն կա ընդհանուր կետեր գտնելու հեղափոխական և էվոլյուցիոն զարգացումներում։ Այսօր ո՛չ իշխանությունը, ո՛չ էլ ցուցարարներն ու ընդդիմությունը առանց միմյանց հետ համագործակցության եզրերի իրավիճակ փոխել չեն կարող»,- ասաց Դավիթ Շահնազարյանը՝ հավելելով նաև, որ ստեղծված իրավիճակում ուղղակի երկխոսությանն այլընտրանք չկա։
