«Ես մասնակցում եմ հանրահավաքներին, ժողովրդի մեջ եմ, և բացարձակ կարիք չկա միջամտելու։ Ամեն ինչ շատ ճիշտ է արվում։ Ավելորդ կլինի որևէ միջամտություն անելը։ Ես վստահ եմ հաղթանակի հարցում»,- «Առաջին լրատվական»-ի հետ զրույցում ասաց ընդդիմադիր գործիչ, ՀԺԿ նախկին համակիր Գրիշա Վիրաբյանը, ով ամիսներ առաջ ևս խոսում էր համահայկական ընդվզման և իշխանափոխության մասին։
Վիրաբյանի խոսքով՝ Նիկոլ Փաշինյանն ու երիտասարդները լուծեցին ամենակարևոր խնդիրը, որը հաղթանակի գրավականն է. ընդդիմության մեջ տեղի ունեցավ սերնդափոխություն։ «Այդ երիտասարդները տեսնելով հաղթանակի բերկրանքը, պայքարի քաղցրությունը՝ այլևս նրանց հետ կանգնեցնել հնարավոր չէ։ Ես կարծում եմ, որ ժամանակի հարց է արդյունքը»,- ասաց Վիրաբյանը՝ հավելելով, որ շատ ճիշտ տակտիկա է ընտրված, երիտասարդները քաղաքի տարբեր հատվածներ շարժվելով՝ ոստիկանները չեն հասցնում նրանց հետևից, չեն հասցնում իրենց տեխնիկան տեղափոխել։
«Երկար ժամանակ ոստիկանները չեն կարող այսպես դիմակայել։ Ի վերջո, հասարակական կարծիք է ձևավորվում։ Երիտասարդները ցանկանում են երկիրը տեսնել ազատ, անկախ, զարգացող»,- ասաց Վիրաբյանը։
Մեր զրուցակիցը վստահ է, որ այս իշխանությունները չեն գնա նորից ուժի կիրառման ցուցարարների նկատմամբ, իսկ այս օրերին փողոցներում առկա զինտեխնիկան, ոստիկանների քանակը պարզապես ուժի ցուցադրություն է։ Ոչ ավելի։
«Ցանկացած ուժի կիրառում բերելու է հակազդեցության, և շարժումն ավելի մեծ թափ կստանա։ Իշխանությունները դա պետք է հասկանան և կատարեն ժողովրդի պահանջը»,- ասաց Վիրաբյանը։
Առավել մանրամասն՝ տեսանյութում: