Ակնառու է, որ ինչպես էլ ավարտվի ներկայիս իրավիճակը, և ինչ սցենարով էլ զարգանան իրադարձությունները, Հայաստանում հնարավոր է խոսել քաղաքական իրավիճակի փոփոխության մասին: Դա կլինի լատենտ փոփոխություն, թե ակնառու դրսևորումներ կլինեն՝ ցույց կտա ժամանակը:
Իհարկե, գլխավոր խնդիրը այն է, որ իրադարձությունների զարգացումը չլինի ողբերգության ճանապարհով, բախումների ճանապարհով, որովհետև դա գործնականում, բացի պետությանն ուղղված հարվածից, ըստ էության չի ունենալու որևէ այլ ազդեցություն, արդյունք կամ հետևանք:
Ինչ վերաբերում է քաղաքական իրավիճակին, ապա այստեղ անշուշտ գործընթացներ կծավալվեն թե՛ ընդդիմության շրջանակում, թե՛ իշխանության: Իհարկե, շատերը ներկայումս գուցե կասեն նաև, որ դեռ հարց է՝ ի վերջո ով է լինելու ընդդիմություն և ով իշխանություն, կամ որն է ընդդիմությունն ու իշխանությունը լինելու, սակայն այսպես թե այնպես նոր իրավիճակը և գործընթացները, ուժերի նոր դասավորությունն անխուսափելի են: Անկասկած առիթներ կլինեն առավել խորքային դիտարկումների:
Ընդհանուր առմամբ, եթե իրավիճակը գնահատենք ներկայիս ստատուս քվոյի պայմաններում, ապա անկախ Նիկոլ Փաշինյանի շարժման հաջողությունից կամ անհաջողությունից՝ ակնհայտ է, որ դրանով տեղի է ունենալու ընդդիմության մեջ ուժերի կամ առնվազն ելակետերի վերադասավորում, որը կբերի լիովին նոր պրոցեսների և անգամ նոր դիսկուրսի, այսպես ասած՝ հետագա վարքագծի նոր ուղղությունների, նաև հանրության նոր ընկալումների, ընդհանրապես պրոցեսների չափման նոր միավորների և նշաձողերի:
Անկասկած հնարավոր են նաև նոր դերակատարներ, բայց դա թերևս 2022 թվականին ավելի մոտ: Իշխանության շրջանում գործընթացները անկասկած կկրեն առավել լատենտ բնույթ, և առերևույթ փոփոխությունները կլինեն գուցե ոչ այնքան հնչեղ, թեև այստեղ էլ իհարկե շատ բան կախված է փողոցում տեղի ունեցողի մասշտաբիւց և դինամիկայից, նվազման, թե ավելացման միտումներից:
Այդուամենայնիվ, իշխանության ներսում տեղի ունեցող գործընթացները կլինեն անխուսափելի և միաժամանակ կկրեն գերազանցապես լատենտ բնույթ: Դրանք առավել արտահայտիչ կդառնան ընտրական ցիկլին մոտ՝ 2021-ին Երևանի քաղաքապետի ընտրության և 2022 թվականին արդեն խորհրդարանի ընտրության:
Դրանցում ամբողջապես կարտացոլվեն իշխանության մեջ ներկայիս զարգացումներից խթանված վերադասավորումները և փոփոխությունների գործընթացները: Չի բացառվում իհարկե, որ դրանք ունենան նաև ավելի շուտ տնտեսական արտահայտվածություն, այսինքն՝ առաջին փուլում այդ փոփոխությունները տեղի ունենան տնտեսական հարաբերակցության տեսքով, հետո նոր՝ քաղաքական:
Լուսանկարը՝ Photolure-ի