Ֆուտբոլի Հայաստանի ազգային հավաքականի գլխավոր մարզիչ Վարդան Մինասյանը «RԷվոլյուցիա» հաղորդմանը տված հարցազրույցը բեկումնային կարելի է համարել: Սպասվածի համաձայն Մինասյանը հայտարարեց, որ աշխատելու ազատ և անկախ: Հիշեցնենք, որ մեր հավաքականի նախկին գլխավոր մարզիչ Արթուր Պետրոսյանը աշխատում էր ՀՖՖ-ի նախագահ Ռուբեն Հայրապետյանի ցուցակով:
Մասնավորապես Յուրա Մովսիսյանը, Գևորգ Կասպարովը այլ ֆուտբոլիստներ ազգային թիմ չէին հրավիրվում Հայրապետյանի հրահանգով: «Բոլոր ֆուտբոլային որոշումները կայացնելու է մարզչական շտաբը: Հավաքականում խաղալու ամենամեծ մոտիվացիան հայրենասիրությունն է: Ուրախալի է, որ Յուրա Մովսիսյանը տեղափոխվել է Շվեդիա, ու մենք իրեն հետևելու ենք: Եթե ցույց տվեց նույն որակները, որոնք մենք գիտենք, ինքը հրավիրվելու է հավաքական»,- նշել էր Մինասյանը: Ինչ է կարելի է եզրակացնել այս հայտարարությունից: Մեր հավաքականի հին ու նոր գլխավոր մարզիչը Ազգերի լիգայի խաղարկությանն ընդառաջ մոբիլիզացնելու է ողջ ներուժը: Նահանջելու տեղ այլևս չկա: Բացի ուժերի մոբիլիզացիայից հավաքականում այսուհետև բոլորովին այլ մթնոլորտ: Ավելի ստույգ կվերանա այն լարվածությունը և վերաբերմունքը, որն առկա էր Արթուր Պետրոսյանի օրոք: Էստոնիայի և Լիտվայի հետ ընկերական հանդիպումներից հետո շատ էր խոսում, որ ազգային հավաքականի ֆուտբոլիստներն իրենց դժգոհությունն են արտահայտել Պետրոսյանի աշխատանքի վերաբերյալ:
Վարդան Մինասյանին նշանակելով և նրան լիակատար ազատություն տալով Ռուբեն Հայրապետյանը ոչ միայն վեհ քայլ կատարեց ազգային հավաքականը փրկելու համար, այլևս ապահովագրեց իրեն մեղադրանքների տարափից: Արթուր Պետրոսյանի կամ այլ գլխավոր մարզչի գլխավորությամբ, առանց Յուրա Մովսիսյանի և մերժված այլ ֆուտբոլիստների ձախողվելու դեպքում ողջ պատասխանատվությունն ընկնելու էր Ռուբեն Հայրապետյանի վրա: Այժմ ՀՖՖ-ի նախագահը Ազգերի լիգայում ձախողվելու դեպքում հնարավորություն կունենա կատարված մեջ մեղադրելու մարզիչներին և ֆուտբոլիստներին: Նախորդ երկու ընտրական մրցաշարերում մեր հավաքականն ուղղակի տապալվել էր: Գրանցված արդյունքների և անհաջողության պատճառների մասին այս պահին խոսելը կարծում ենք ավելորդ է: Մինասյանի հեռանալուց հետո ՀՖՖ-ի նախագահի սկզբունքների պատճառով մենք 5 տարի կորցրեցինք և ոչ միայն դոփեցինք տեղում, այլև զգալի նահանջեցինք: Կարծում ենք ակնհայտ է, որ Մինասյանի 2013 թվականին չհեռանալու դեպքում կունենայինք բոլորովին այլ որակի և մակարդակի հավաքական: Ինչևէ, այսօր ունենք այն ինչ ունենք:
Աշխատանքի անցնելուն պես Մինասյանը կատարեց բավական կարևոր մի քայլ: Խոսքը մեր հավաքականի նախկին դարպասապահ Ռոման Բերեզվոսկիին մարզչական շտաբում ընդգրկելն է: Այսօր Հայաստանի հավաքականի թիվ մեկ խնդիրը նորմալ դարպասապահի բացակայությունն է: Իր փորձով և գիտելիքներով Բերեվեզովսկին որոշակիորեն կարող է շտկել իրավիճակը: Եթե «Տոսնոյի» դարպասապահ Դավիթ Յուրչենկոյի հետ այդպես էլ չհաջողվի ընդհանուր հայտարարի գալ ապա հույսներս պետք է դնենք Հայաստանի առաջնությունում ելույթ ունեցող դարպասապահների վրա: Այդ դեպքում Բերեզովսկու դերակատարությունը մեծ կլինի: Մինասյանի մարզչական փիլիսոփայության կարևոր բաղադրիչներից կարելի է համարել հայրենասիրությունը: «Առաջին լրատվական»-ի տեղեկություններով ազգային հավաքականում աշխատելու ժամանակ կարևոր հանդիպումներից հետո Մինասյանը կազմակերպել է հայրենասիրական ֆիլմերի դիտում, որը բարձրացրել է թիմի մարտական հոգին: Վերջին շրջանում մեր ֆուտբոլիստների մոտ չի նկատվում այն ձգտումն ու նվիրվածությունը, որը առկա էր 2012 և 2014 թվականներին ընտրական փուլերի ժամանակ:
Այնպիսի տպավորություն էր, որ ֆուտբոլիստները խաղում են խաղալու համար անհաբեր սպասելով, թե երբ է գլխավոր մրցավարն ազդարարելու մրցավեճի ավարտը: Նույիսկ երբ պարտվողի դերում էինք մեր դարպասապահները չէին շտապում գնդակը խաղի մեջ մտցնել: Երկրպագուների շրջանում դժգոհությունը մեծ էր նաև Հենրիխ Մխիթարյանից: Շատերն այն կարծիքին էին, որ մեր հավաքականի ավագն իրեն խնայում է: Ընդունենք, որ վերջին տարիների հավաքականում իսկապես դժվար էր կենտրոնանալն ու նվիրված խաղալը: Երբ չեն նշմարվում հաղթանակի նախադրյալներն ու հիմքերը բավական դժվար է խաղադաշտում սիրտ ու ոգի ներդնելը: Մայիսի 29-ին և հունիսի 3-ին Հայաստանի ազգային հավաքականը Մինասյանի գլխավորությամբ ընկերական հանդիպումներ կանցկացնեն:
Այս հանդիպումները վերջինը կլինեն Ազգերի լիգայի խաղարկությանն ընդառաջ: Հուսանք, որ այս հանդիպումներում կտեսնենք նոր հավաքական, որը կապացուցի, որ կարող է պայքարել Ազգերի լիգայի խաղարկության հաղթողի կոչման համար: