«Լավրովի հայտարարությունը պետք է քաղաքական ընդհանուր կոնտեքստում նայել․ Ռուսաստանի ինչին էր պետք նորից մանրամասն խոսել Կազանյան փաստաթղթի մասին՝ իմ կարծիքով, դա ստեղծված իրավիճակում կապված է Ռուսաստանի վարած քաղաքականության հետ։ Ռուսաստանը տեսնում ենք, որ փորձում է մաքսիմալ սերտ կապեր ստեղծել Թուրքիայի հետ՝ Իրան-Ռուսաստան-Թուրքիա ձևաչափով և բնական է, որ այդ ֆորմատում հարցեր ծագում են կապված ղարաբաղյան հիմնախնդրի հետ և Ադրբեջանն անընդհատ փորձում է օգտագործել Ռուսաստան-Թուրքիա մերձեցումը, որպեսզի ղարաբաղյան հարցին միջազգային նոր հնչեղություն տա»,- «Առաջին լրատվական»-ի հետ զրույցում նշեց քաղաքագետ Մանվել Սարգսյանը։
Վերջինիս կարծիքով, եթե ստեղծվեն նախադրյալներ բանակցությունները վերսկսելու համար, ապա նշանակություն չունի, թե ինչ փաստաթղթի շուրջ են դրանք ընթանալու, քանի որ ըստ Սարգսյանի՝ այս տարիների ընթացքում ներկայացված փաստաթղթերի մեջ որևէ էական տարբերություն չկա, բացառությամբ մեկ կետի՝ մադրիդյան փաստաթղթում ամրագրված է ազգերի ինքնորոշման իրավունքը։
«Միջազգային իրավիճակն է փոխվում․ իզուր չէ, որ Բաքուն անընդհատ նորանոր մտահոգություններ է հայտնում, որովհետև այս տարվա ընթացքում մենք տեսանք ԼՂՀ իշխանությունների ակտիվությունը՝ ընդունելություն եղավ ԱՄՆ-ի Կոնգրեսում, ընդունելություն եղավ Ֆրանսիայի կոնգրեսմենների և Սենատի ներկայացուցիչների կողմից և այս ամբողջը շատ լուրջ է և դրա համար էլ Ադրբեջանը խիստ ռեակցիաներ է տալիս դրան՝ փորձելով ամեն կերպ հույսեր կապել Ռուսաստանի հետ՝ հասկանալով, որ այս դե ֆակտո ճանաչումը և դե ֆակտո տեղ տալը Արցախի իշխանություններին լուրջ փոփոխություններ է նշանակում, այսինքն ստատուսի խնդիրը շատ ավելի լուրջ է դառնում։ Եթե սկսվեն նոր բանակցություններ, ապա բնական է, որ Ադրբեջանից ավելի խիստ են պահանջելու հստակեցնել իր վերաբերմունքը ստատուսի խնդրին»,-ընդգծեց քաղաքագետը։
Հիշեցնենք, որ ապրիլի 9-ին լրատվամիջոցներին տված հարցազրույցում Սերգեյ Լավրովը հայտարարել է, որ Կազանյան փաստաթղթում պարունակվող շատ բաներ նախկինի պես պահանջված են։
Լավրովը մասնավորապես ասել է․ «Համոզված եմ, որ շատ բաներ, որոնք պարունակում էր կազանյան փաստաթուղթը, նախկինի պես պահանջված են։ Դա են հաստատում Երևանի ու Բաքվի արձագանքները՝ այդ ժամանակից ի վեր նախագահների, նախարարների ու համանախագահների մակարդակով տեղի ունեցած շփումների ժամանակ։
Այդ տարիներին մշակված աշխատանքից ոչինչ, կարծում եմ, չի կորել»։
Մանրամասները՝ տեսանյութում։