«Այդ պատժամիջոցների հիմքը բացառապես քաղաքական տրամադրություններն են և առաջիկայում այո, ցանկացած անգամ փոքր միջադեպ կարող է բերել պատժամիջոցների ավելի մեծ խմբաքանակի, իսկ ինչ վերաբերում է ռուբլու արժեզրկման ու ռուսական տնտեսության իրավիճակին, ապա ճեմ կարծում, որ ապրիլի 9-ին ֆոնդային բորսաներում տեղի ունեցած իրադարձությունները կարելի է համարել աննախադեպ վերջին տարիների համար, քանի որ սկսած 2014թ-ից ռուսական ֆոնդային և արժութային շուկայում նմանատիպ տատանումներ եղել են»,- «Առաջին լրատվական»-ի հետ զրույցում նշեց տնտեսագետ Մեսրոպ Առաքելյանը՝ մեկնաբանելով վերջին օրերին ռուսական ռուբլու կտրուկ արժեզրկման ազդեցությունը Ռուսաստանի տնտեսության վրա և պաշտոնական Վաշինգտոնի կողմից Ռուսաստանի դեմ սահմանված նոր պատժամիջոցների մասին։
Հիշեցնենք, որ ԱՄՆ-ի ֆինանսների նախարարությունն ապրիլի 6-ին նոր պատժամիջոցներ սահմանեց Ռուսաստանի 38 պաշտոնյաների, խոշոր գործարարների ու ընկերությունների նկատմամբ․ հրապարակված ցուցակում հայտնված մարդկանց մուտքը ԱՄՆ արգելվում է, սառեցվում են նրանց բոլոր հաշիվները Միացյալ Նահանգներում, ամերիկյան ընկերություններին էլ արգելվում է որևէ գործ ունենալ ցուցակում հայտնված մարդկանց և ընկերությունների հետ։ Բացի դա, պատժամիջոցների հետևանքով վերջին օրերին կտրուկ արժեզրկվել է նաև ռուսական արտարժույթը՝ ռուբլին։
Տնտեսագետի պնդմամբ՝ սահմանված այս պատժամիջոցները և այդ ցանկում հայտնված ռուսական ընկերությունների ներառումը դեռևս հիմք չէ կարծելու, որ առաջիկայում Ռուսաստանի տնտեսությունն առաջիկա ամիսներին գնում է դեպի կործանման․ «Խնդիրներ՝ այո, կարող են առաջանալ, տարբեր ընկերություններ՝ թե մասնավոր, թե պետական կարող են փակվել, սնանկանալ, օտարերկրյա ներդրողները կարող են դուրս գալ Ռուսաստանից, սակայն որ Ռուսաստանն ունենա բյուջետային խնդիրներ և գնա դեպի դեֆոլտ՝ ես չեմ տեսնում, համենայնդեպս, գոնե այս պահի դրությամբ դրան հասնելու համար ԱՄՆ-ի և ԵՄ-ի կողմից կիրառվող գործիքները բավարար չեն»,-հավելեց Առաքելյանը։
Մանրամասները՝ տեսանյութում։