«Թվում է, թե հասարակությունը հանգիստ է, բայց իրականում հասարակությունն իշխանությունից օտարված է։ Եթե գործողության նկատմամբ վստահություն լինի՝ հարցը կլուծվի»,- «Առաջին լրատվական»-ի հետ զրույցում՝ անդրադառնալով մայրաքաղաքում նախատեսվող բողոքի միջոցառումներին, նման տեսակետ հայտնեց քաղաքագետ Լևոն Շիրինյանը։
Մեր զրուցակիցը շարունակում է՝ այսօր միակ խնդիրը վստահության պակասն է․«Ընդհանրապես մեր հասարակությունն այդ բնավորությունն ունի՝ կրիտիկական զանգվածը վերջին օրերին հավաքվում է։ Իշխանությունը ոչ մի ձևով չի ուզում ընդառաջ գնալ հասարակության պահանջներին։ Միայն խոսում են հաղթանակներից ու հաջողություններից, բայց արտագաղթող երկրում ի՞նչ հաջողություն կարող է գրանցվել։ Հարցն այստեղ Նիկոլ Փաշինյանը չէ, հասարակությունը կարող է ոտքի կանգնել այնպես, ինչպես արցախյան շարժման ժամանակ։ Իշխանությունը պետք է ոչ թե իմիտացիա աներ, այլ լայն ռեֆորմների ծրագրով հանդես գար»։
Քաղաքագետի դիտարկմամբ՝ կարող է բողոքի լայն ալիք բարձրանալ, բայց թե ինչ արդյունք կլինի, դժվար է կանխատեսել. «Չորս օրը հերիք չէ, բայց կարծում եմ՝ բողոքի ակցիաները շարունակական կլինեն։ Չորս օրում չի ստացվի, բայց լավ կլինի, որ իշխանությունը հետևի այս ակցիաներին ու հետևություններ անի։ Թող հայտարարություններ անի, ասի՝ այսպիսի փոփոխություններ կլինեն։ Արմատական մոդերնիզացիայի խնդիր կա։ Իրենք ձևացնում են, թե ամեն ինչ լավ է։ Բայց մարդկանց կյանքը լավ չէ։ Իհարկե ժամանակը քիչ է, վառ արտահայտված խարիզմատիկ լիդերները չկան, եթե դա լիներ՝ հաջողության հասնելու հնարավորությունը մեծ կլիներ։ Հերիք է խոսեն հաջողություններից, ի՞նչ հաջողություններ կան այս երկրում»։
Լևոն Շիրինյանի խոսքերով՝ նման երկրներում նաև բանակը պետք է իր խոսքն ասի։ «Հիմա դժվարանում եմ ասել՝ ինչ կարող է լինել, բայց ակնհայտ է հասարակության բացարձակ դժգոհությունն ու օտարումը։ Ոչ միայն իշխանությանը չեն հավատում, այլ նաև ընդդիմությանը։ Ամեն դեպքում՝ այս մաշող, քայքայող ճգնաժամը հաղթահարել է պետք։ Իրենց գրանցած հաջողությունն իրենց համար է, ոչ թե ժողովրդի։ Ամեն դեպքում պետք է միջոցներ ձեռնարկեն։ Պարտադիր չէ, որ բողոքի ակցիաներ լինեն, որ պետական ինստիտուտները աշխատեն, պաշտոնյաներն էլ իրենց պարտականությունները կատարեն։ Մարդիկ հո կրակը չե՞ն ընկել, ամեն ինչի համար բողոքեն, որ իրենց պարտականությունները կատարեն։ Ասել եմ չէ՝ անհրաժեշտ է 4-րդ հանրապետություն հռչակել։ Նոր նախագահն առաջին ելույթում սխալվեց ասաց, որ 4-րդ հանրապետության առաջին նախագահը, հետո լռեց, բայց պետք է շարունակեր։ Իրականությունը փոխվել է, պետք է իրականությանն ադեկվատ արձագանքել»,- եզրափակեց նա։
Լուսանկարը՝ Photolure-ի
