Ցանկացած պահի, ցանկացած երկրում կարող է լինել երկու մոտեցում՝ գնալ հեղափոխական փոփոխությունների, թե աստիճանական փոփոխությունների ճանապարհով՝ բարելավելով իրավիճակը։ Այս մասին «Առաջին լրատվական»-ի հետ զրույցում նշեց Հայ-սլավոնական համալսարանի ռեկտոր, նախկին վարչապետ Արմեն Դարբինյանը։
Նրա խոսքերով՝ քաղաքական իրավիճակի փոփոխության պարագայում այլ կուսակցական թիմերը կարող են առաջարկել հեղափոխական մոտեցումներ, որոնք մերժում են մինչև այժմ եղած փորձը։ «Ես իմ բնույթով հեղափոխական եմ, առավել կողմնակից եմ հեղափոխական տիպի բարեփոխումների ու գործողությունների։ Հենց այդպիսին էր նաև 1998 թվականին ձևավորված իմ կառավարության բնույթը։ Պատահական չէ, որ այդ կառավարությունը կոչվեց արհեստավարժների կառավարություն։ Երիտասարդ, ճիշտ է՝ քաղաքական փորձառություն չունեցող, բայց իրենց ոլորտների հստակ և շատ բարձր որակի մասնագետներ էին, որոնք հեղափոխական փոփոխություններ կատարեցին երկրի տնտեսության մեջ։ Հիշեցնեմ, որ մեծ մասնավորեցումը տեղի ունեցավ հենց մեր կառավարության ժամանակ, երբ մենք «Financial Times»-ում ներկայացրեցինք Հայաստանի տնտեսության որոշակի օղակներ և առաջարկեցինք միջազգային ինվեստիցիոն ընկերություններին, և մի քանի խոշոր գործարք մեզ հաջողվեց իրականացնել»,- ասաց Արմեն Դարբինյանը։
Նա նշեց, որ այդուհանդերձ, միշտ պետք է հիշել, որ ցանկացած հեղափոխական փոփոխության պարագայում մենք կարող ենք ունենալ վտանգ՝ կապված Ղարաբաղյան հակամարտության չլուծված լինելու, և այդ դեպքում պատերազմի վերսկսման վտանգն ավելանում է։
«Եթե մենք երկրում հեղափոխական փոփոխություններ ենք իրականացնում, պատերազմի սպառնալիքը մեծանում է։ Երկրի քաղաքական ղեկավարումը ենթադրում է, որ ցանկացած ոք, ով հավակնում է ստանձնելու քաղաքական ղեկը, պետք է կշռի՝ արդյոք որոշակի հեղափոխական գործողություններ չեն վտանգելու մեր անվտանգության հարցերը և արդյոք մենք ավելի շատ չենք մոտեցնի պատերազմական իրավիճակը։ Սերժ Սարգսյանի ընտրությունը հենց այստեղ է։ Ես հասկանում եմ, որ Սերժ Սարգսյանը աստիճանաբար փոփոխություններ կատարող գործիչ է և հեղափոխական փոփոխությունների չի գնա այդ վտանգը գիտակցելով»,- ասաց նա։
Ամբողջությամբ՝ տեսանյութում։