Այսօր Ժնևում տեղի կունենա Հարավային Կովկասի վերաբերյալ բազմակողմանի բանակցությունների հերթական փուլերից մեկը։ Թբիլիսիում դրան մեծ ուշադրությամբ և մտահոգությամբ են հետևում։ Հանդիպումից շատ առաջ լրատվամիջոցներում և քաղաքական շրջանակներում սկսել են լուրեր շրջանառվել, որ ուժի չկիրառման մասին համատեղ հայտարարություն կարող է ստորագրվել կամ բանավոր ընդունվել։
Խոսքը պայմանագիր ստորագրելու կամ բանակցությունների մասնակիցների կողմից ուժ չկիրառելու մասին պայմանագիր ստորագրելուն է վերաբերում։ Մասնակիցներն են՝ Վրաստանը, ՌԴ-ն, ԱՄՆ-ն, Աբխազիան, Հարավային Օսիան, ինչպես նաև ԵՄ-ն, ՄԱԿ-ը, ԵԱՀԿ-ն։
Վրաստանի ընդդիմությունն այս փաստը համարում է Աբխազիայի և Հարավային Օսիայի ինքնիշխանության ճանաչում, քանի որ նրանք բանակցություններում ստանում են նույն իրավունքները, ինչ Վրաստանը։ Փորձելով մեղմել իրավիճակը՝ ԱԳ նախարար Միխեիլ Ջանելիձեն հայտարարել է, որ ոչինչ ստորագրել չի նախատեսվում։
Վրացական կողմի համար օպտիմալ տարբերակ է միայն ՌԴ-ի հետ ուժ չկիրառելու մասին պայմանագիր կնքելը։ Մի շարք արմատական գործիչների համար անընդունելի է, եթե պայմանագիրը ստորագրեն նաև Աբխազիան և Հարավային Օսիան․ դա նրանց ինքնիշխանության անուղղակի ապացույցը կդառնա։
Սակայն Ռուսաստանի համար նման մոտեցումն է անընդունելի։ Մոսկվան պնդում է, որ հակամարտության կողմերն են՝ Վրաստանը, Աբխազիան և Հարավային Օսիան։ Հետևաբար, նրանք ևս պայմանագիրը ստորագրելու իրավունք ունեն։