Սիրիան շարունակում է մնալ գերտերությունների ուշադրության կիզակետում: Հյուսիսային Սիրիայի ռազմավարական շրջանների համար պայքարը որոշիչ փուլ է մտել: Թուրքիայի նախագահ Ռեջեփ Թայիփ Էրդողանը քրդաբնակ Աֆրինը գրավելուց կամ իր բնորոշմամբ ազատագրելուց հետո հայտարարել է, որ մտադիր է ամբողջությամբ վերահսկողություն սահմանել հարևան պետության սահմանամերձ տարածքների վրա՝ խոստանալով, որ «Ձիթենու» ճյուղ ռազմական գործողությունը կշարունակվի Մանբիջում և Կամիշլիում:
Փորձագետները, սակայն, կարծում են, որ Անկարայի համար այդքան էլ դյուրին չի լինի Աֆրինից դեպի արևելք շարժվել, քանի որ այս շրջանում լուրջ շահեր և ներկայություն ունի Միացյալ Նահանգները:
Արդյոք Անկարայի ծրագրերը հերթական փորձությունը կդառնան Վաշինգտոնի հետ հարաբերություններում, ի՞նչ դրության մեջ կհայտնվի Ռուսաստանը, որը փորձում է պահպանել Սիրիայի ամբողջականությունը, որն անմիջական սպառնալիքի տակ է հայտնվել Անկարայի գործողությունների հետևանքով: Մեզ՝ հայերիս համար, թերևս, ամենակարևոր հարցը. ի՞նչ վտանգ է սպառնում հայերին, որոնք բնակվում են սիրիական խոշոր քաղաքներից դուրս, օրինակ Ալ-Հասաքեում, որի կենտրոնն է Կամիշլին: Այս և մի շարք այլ ուշագրավ հարցերի շուրջ «Առաջին Լրատվական»-ը զրուցել է արաբագետ Սարգիս Գրիգորյանի հետ:
Մեր զրուցակցի խոսքով՝ Աֆրինից մեղմ ասած տխուր լուրեր են հասնում, տեղեկություններ կան, որ համընդհանուր թալան է, բացի այդ թուրքերը բավականին դաժան հաշվեհարդար են տեսնում այն քրդերի հանդեպ, որոնք չէին լքել քաղաքը:
«Ունենալով Էրդողան լիդեր, կարծում եմ՝ չի կարելի բացառել, որ Թուրքիան կշարունակի ռազմական գործողությունները՝ չնայած այն հաշվարկներին, այն խոչընդոտներին, որոնք Թուրքիան կարող էր հանդիպել և հիմա էլ հանդիպում է հատկապես Սիրիայում հյուսիսում: Ես օրինակ կարծում էի, որ Աֆրինում նման լայնածավալ գործողություններ չէին լինի, բայց տեսնում ենք, որ հասան Աֆրին և վերցրեցին քաղաքը»
Անդրադառնալով Մանբիջին՝ Գրիգորյանը նշեց, որ այստեղ է գտնվում Միացյալ Նահանգների 2000 հոգանոց հատուկ ջոկատայինների խումբը, Վաշինգտոնը հայտարարել է, որ մտադիր չէ թողնել քաղաքը: «Անկախ ամեն ինչից՝ ըստ իս, Թուրքիան պետք է լուծի Սիրիայի հյուսիսի հարցը, այսինքն հնարավորինս չեզոքացնի քրդերին, որպեսզի այստեղ հայտնվի այնպիսի հատված, այնպիսի բնակչություն, որը կանխատեսելի կլինի Թուրքիայի համար»,-հավելեց նա:
Մեր զրուցակիցը չբացառեց նաև, որ Անկարան և Վաշինգտոնն, ըստ ամենայնի, եկել են փոխըմբռնման: Գրիգորյանի կարծիքով՝ Մանբիջի հարցում Միացյալ Նահանգները ուզի, թե չուզի պետք է հաշվի նստի ՆԱՏՕ-ի իր դաշնակցի հետ: «Մանբիջի խնդիրն այլ է: ԱՄՆ-ը ժամանակ առ ժամանակ Թուրքիային հավաստիացնում էր, որ քրդերը չեն հասնի մինչև Մանբիջ: Եվ Թուրքիան, երբ որ ասում է, որ Միացյալ Նահանգները խաբեց նաև այս հարցում, որոշակի ճշմարտություն կա»:
Անդրադառանալով Իրաքի հյուսիսում Թուրքիայի կողմից հավանական ռազմական գործողությանը՝ Գրիգորյանն ասաց, որ այս դեպքում ականատես չենք լինի նման ակտիվ գործողության, ինչպես Սիրիայում, բայց Անկարան այստեղ ևս ուշադրության կենտրոնում կպահի PKK-ի զինյալների շարժը:
Այն հարցին, թե ինչ կլինի Կամիշլիի հայերի ճակատագիրը, եթե Թուրքիան ռազմական գործողություն սկսի այս շրջանում, Գրիգորյանն ասաց. «Անորոշ է, իսկ անորոշությունը ենթադրում է, որ ընդհանուր վտանգված է հայերի կարգավիճակը, հայերի դրությունը Սիրիայում, որովհետև այստեղ մենք տեսնում ենք ոչ միայն հավակնոտ թուրքական քաղաքականություն, այլ նաև՝ Թուրքիայի հետ գործող ընդդիմադիր զանազան այլ կառույցներ, որոնք մեղմ ասած էթնոդավանական քաղաքականությամբ վտանգ են ներկայացնում»: