Կապի ու տրանսպորտի նախարար Վահան Մարտիրոսյանը նախօրեին Սերժ Սարգսյանին ներկայացնելով ոլորտում պլանավորվող աշխատանքները՝ ասել է, որ այս տարվա ընթացքում կանխատեսվում է նաև ձեռք բերել երկրորդ էլեկտրագնացքը։
Հիշեցնենք, որ «Հարավկովկասյան երկաթուղիներ» ընկերության կողմից դեպի Գյումրի և հակառակ ուղղությամբ առաջին էլէկտրագնացքը կանոնավոր կերպով շահագործման հանձնվեց մարտի 8-ից։ Ընդ որում՝ տոնական օրերին անվճար էր, իսկ մարտի 12-ից՝ արդեն վճարովի՝ մեկ ուղղությամբ՝ 2500 դրամ։
Կապի և տրանսպորտի նախարարության երկաթուղու վարչության նախկին պետ, փաստաբան Արսեն Մկրտչյանը «Առաջին լրատվական»-ի հետ զրույցում ասաց, որ ողջունելի կլինի, եթե ՀԿԵ-ն երկրորդ գնացքը գնի և հանձնի շահագործման, սակայն կոնցեսիոն պայմանագրով նախատեսված ներդրումային ծրագիրը, որը նախատեսված է շարժակազմ ձեռք բերելու համար, արդեն ավարտված է։ Եվ հայտնի չէ, թե ինչպես արդեն գնված գնացքը, ինչպես նաև նորը, որը պետք է ձեռք բերվի, ինչ միջոցների հաշվին է լինելու։ «Բայց անկախ նրանից, թե ինչ գումարով են բերում, դա լավ բան է։ Միևնույն ժամանակ մեզ համար գաղտնիք չէ, որ տարեկան մոտ 1 միլիոն դոլար ՀՀ բյուջեից հատկացվում է երկաթուղուն ուղևորափոխադրումից կրած վնասները հատուցելու համար։ Բացի դրանից՝ պարզ է նաև, որ մի գնացքով, երկու գնացքով երկաթուղու վնասները չեն փոխհատուցվելու։ Հատկացված 1 միլիոն դոլարով էլ փակվում է վնասների 30 տոկոսը, մնացած 70 տոկոսը երկաթուղու վրա է»,- ասաց Մկրտչյանը։
Անդրադառնալով նոր գործարկված էլեկտրագնացքին և դրա առաջարկած գնին, Մկրտչյանն ասաց, որ բոլորը շեշտադրում են բարձր գինը, բայց ուշադրություն չեն դարձնում, որ երկաթուղին ժամանակ առ ժամաակ փոխադրումներ է իրականացնում անվճար, որը ոչ այլ ինչ է, քան իրական դեմպինգ։ Այլ հարց է, որ 2500 դրամը թանկ է։ Ստացվում է, որ շահույթ հետապնդող ընկերությունը իր կոմերցիոն ռիսկի հաշվին պետք է գին սահմանի, կոնցեսիոն պայմանագրով ինքն ունի այդ՝ գին սահմանելու ազատությունը»,- նշեց Մկրտչյանը։
Ինչ վերաբերում է նոր էլէկտրագնացքի ձեռքբերման միջոցներին, ապա Մկրտչյանը նշեց, որ հնարավոր է ներդրումային ծրագիրը շտկած լինեն, փոփոխած լինեն և նախատեսած լինեն, որ այն գումարները, որոնք պետք է ուղղվեին ենթակառուցվածքների վրա, այդ գումարները վերցնեն և ներդնեն շարժակազմի մեջ։ «Միևնույն է, ենթակառուցվածքի մեջ էլ են ուտում գումարները, շարժակազմի մասով էլ վաղուց կերել վերջացրել են։ Գոնե մի գնացք գնեն, որ ցույց տան՝ մի բան արել են։ Այս պահի դրությամբ գնացքը միակ բանն է, որը կարող են որպես արված աշխատանքի արդյունք ներկայացնել։ Ցուցադրելու այլ բան չի մնում»,- եզրափակեց Արսեն Մկրտչյանը՝ հավելելով, որ անկախ ամեն ինչից, եթե էլեկտրագնացքները սկսեն շատանալ, ապա դրանք միանշանակ կաշխատեն։
Հիշեցնենք, որ Հայաստանի երկաթուղին 2008 թվականից, երբ Սերժ Սարգսյանը ստանձնեց Հայաստանի նախագահի պաշտոնը, հավատարմագրային կառավարման հանձնվեց Ռուսաստանի երկաթուղիներ ընկերությանը՝ 30 տարի ժամկետով: Կառավարումը իրականացվում է «Հարավկովկասյան երկաթուղիներ» ընկերության միջոցով։