Ծայրահեղ ծանր է շարունակում մնալ հնդկական Ուտարա–Պրադեշ նահանգի 35–ամյա բնակչի վիճակը, ում փողոցային շոուի ժամանակ քիչ էր մնացել խեղդեր «ձեռնասուն» պիթոնը։ Նրա շոուն, որը կարող է վերջինը լինել իր կարիերայում, տեսանկարվել է։
Մարտի 20-ին, շուկայի հրապարակում, որտեղ օձահման իր շոուն էր ցուցադրում, բավական հանդիսատես էր հավաքվել։ Բայց, դատելով կադրերից, նրան ավելի շատ ծաղրածուի տեղ են դրել, քան օձահմայի։
Երբ պիթոնը փաթաթվել է տղամարդու վզի շուրջը և նա գետին է ընկել՝ դուրս պրծած աչքերով և բերանից փրփուր հոսելով, նրան ոչ ոք օգնության չի եկել. հավաքվածները սպասել են, որ կատակը շուտով կավարտվի և շոուն կշարունակվի։
Մի քանի րոպե անց նրանք գիտակցել են, որ պատմությունը ողբերգական շրջադարձ է ստանում, շտապ օգնություն են կանչել և պիթոնին մի կողմ տարել։ Տուժածին անգիտակից վիճակում բժշկական կենտրոն են հասցրել։ Բժիշկները շարունակում են պայքարել նրա կյանքի համար։