ԱԺ-ում այսօր՝ մարտի 23-ին, անցկացվում է արտահերթ նիստ կառավարության նախաձեռնությամբ: Քննարկվում է Կառավարության կառուցվածքի և գործունեության մասին օրենքը 2-րդ ընթերցմամբ ընդունելու հարցը:
«Ելք» խմբակցության պատգամավոր Էդմեն Մարուքյանը արդարադատության նախարար Դավիթ Հարությունյանին խնդրեց հիմնավորել, թե իրենց առաջարկներն ինչի հիման վրա են մերժվել:
Ի պատասխան՝ Դավիթ Հարությունյանն ասաց, որ մերժվել է կառավարության վերադասավորման հարցը. «Սա քաղաքական խնդիր է, և յուրաքանչյուր կառավարություն ինքն է առաջարկում այն կառուցվածքը, որը տվյալ փուլում առավել նպատակահարմար է համարում»:
Նախարարի խոսքով՝ եթե իշխանության լինի մեկ այլ քաղաքական ուժ, կներկայացնի իր տեսլականը:
Նախարարը նշեց, որ «Ելք»-ի՝ Ոստիկանության զորքերին առնչվող առաջարկը շատ վտանգավոր է. «Առաջարկում եք, որ ոստիկանության զորքերի թվաքանակը լինի հրապարակային: Շատ վտանգավոր բան եք առաջարկում, որովհետեւ ոստիկանական զորքերը մեր զորքերի մի մասն են և կարող են ներգրավվել երկրի պաշտպանության գործում: Իսկ ստիպել տրամադրել տեղեկատվություն, որը մեր հակառակորդը սիրով կընդունի, ես կարծում եմ՝ լավագույն ծառայությունը չեք մատուցում Հայաստանին»:
Հակադարձելով՝ Էդմոն Մարուքյանն ասաց. «Ձեր մեղադրանքը, թե ում ենք ծառայություն մատուցում… Մենք ծառայում ենք ՀՀ քաղաքացիներին, և մեր առաջարկը միտված է Հայաստանը ոստիկանական երկիր չդարձնելուն: Կարող եք մերժել մեր առաջարկը, բայց «նամյոկ» անել, թե մենք ծառայություն ենք մատուցում թշնամիներին, կոռեկտ չէ և վիրավորական է»:
Մանրամասները՝ տեսանյութում: