Ֆուտբոլի Հայաստանի ազգային հավաքականը վաղը 2018 թվականի առաջին հանդիպումը կանցկացնի, Վազգեն Սարգսյանի անվան «Հանրապետական» մարզադաշտում մրցելով Էստոնիայի հավաքականի հետ: Ձախողված 2017 թվականից հետո 2018-ը կարող է բեկումնային լինել մեզ համար, քանզի իրական հնարավորություն է ընձեռվել նվաճելու 2020 թվականի Եվրոպայի առաջնության եզրափակիչ փուլի ուղեգրի: «Չնայած, որ կլինեն մարտավական և խաղացողների փոփոխություններ, այդուհանդերձ ամեն ինչ անելու ենք հաղթելու համար»,- երեկ լրագրողների հետ հանդիպմանն ասաց մեր հավաքականի ավագ Հենրիխ Մխիթարյանը:
Լրագրողներին հանդիպած մեր հավաքականի բոլոր ֆուտբոլիստները կարևորում էին առաջիկա խաղում հաղթելը: Բնական է, անհաջող ելույթների շարքից հետո ֆուտբոլիստները ևս ցանկանում են այսպես ասած ուշքի գալ և վերաձևավորել հաղթողի հոգեբանությունը: Վնասվածքի պատճառով վաղվա խաղին չի մասնակցի մեր առաջատար խաղացողներից Արաս Օզբիլիսը: Նա միացել էր ազգային հավաքականին, սակայն վնասվածք էր ստացել երկրորդ մարզման ժամանակ: Օզբիլիսի փոխարեն Արթուր Պետրոսյանը հավաքական է հրավիրել Երևանի «Փյունիկի» կիսապաշտպան Հայաստանի երիտասարդական հավաքականի ավագ Պետրոս Ավետիսյանին: Վերջինս տպավորիչ խաղ է ցուցադրում Հայաստանի բարձրագույն խմբի առաջնությունում և կարծում ենք արժանի էր ազգային հավաքական հրավիրելու: Ծնկի հոդի վնասվածքի պատճառով Էստոնիայի խաղին չի մասնակցի նաև Մարկոս Պիզելին: Առանցքային այս երկու ֆուտբոլիստների բացակայությունն ինչ խոսք հնարավորություն է երիտասարդների համար:
Այժմ փորձենք հասկանալ, թե Էստոնիայի ընտրանու դեմ ինչ կազմով խաղը կսկսի Հայաստանի ազգային թիմը: «Առաջին լրատվական»-ի վարկածով դարպասում կլինի «Բանանցի» ներկայացուցիչ Արամ Աբրահամյանը, իսկ պաշտպանության կենտրոնում՝ Վարազդատ Հարոյանը՝ Եկատերինբուրգի «Ուրալից» և Հովհաննես Համբարձումյանը՝ մակեդոնական «Վարդարից»: «Ալաշկերտի» պաշտպան Գագիկ Դաղբաշյանը կգործի պաշտպանության ձախ եզրում, իսկ աջ եզրում կլինի «Շիրակը» ներկայացնող Ռոբերտ Դարբինյանը: Հենակետային կիսապաշտպանի դիրքում կխաղա «Ալաշկերտի» մեկ այլ ներկայացուցիչ Արտակ Գրիգորյանը ինչպես նաև «Բանանցի» ներկայացուցիչ Ռումյան Հովսեփյանին: Վերջինս կգործի ավելի առաջ քաշված: Կիսապաշտպանության ձախ եզրում կխաղա Գևորգ Ղազարյանը պորտուգալական «Մարիտիմուից», իսկ աջից կգործի «Ալաշկերտի» կիսապաշտպան Արտյոմ Սիմոնյանը: Մեր հավաքականի ավագ, Լոնդոնի «Արսենալի» ներկայացուցիչ Հենրիխ Մխիթարյանը Մարկոս Պիզելիի բացակայության պայմաններում կլինի ենթահարձակվողի դիրքում: Կենտրոնական հարձակվողի դիրքում կլինի արգենտինական «Ատլետիկո Ուրականի» հարձակվող Նորբերտո Բրիասկո Բալեկյանը, որը նորամուտը կնշի Հայաստանի ազգային հավաքականում: Բնական է, որ վաղը բազմաթիվ փոփոխություններ կլինեն:
Ամենայն հավանականությամբ խաղի ընթացքում Արթուր Պետրոսյանը կկատարի նաև դիրքային և տակտիկական փոփոխություններ: Դրսևորվելու հնարավորություն կստանա Էրիկ Վարդանյանը «Փյունիկից», որը բավական գեղեցիկ գոլի հեղինակ էր դարձել անցյալ տարվա նոյեմբերին Երևանում տեղի ունեցած Բելառուսի հետ ընկերական հանդիպման ժամանակ: Կարծում ենք խաղադաշտում կտեսնենք նաև «Փյունիկի» մյուս ներկայացուցիչներին՝ պաշտպան Արթուր Քարտաշյանին և Պետրոս Ավետիսյանին: Արթուր Պետրոսյանը տրամադրության տակ ունի նաև այնպիսի ֆուտբոլիստների, ինչպիսիք են պաշտպան Հայկ Իշխանյանը «Գանձասար-Կապանից», Գաել Անդոնյանը Մարսելի «Օլիմպիկից» կիսապաշտպան Էդգար Մալաքյանը Ղազախստանի «Ժետիսուից», հարձակվող Սարգիս Ադամյանը գերմանական «Յան Ռեգենսբուգրից»: Վերջին շրջանում Ադամյանը հաջող է ելույթ ունենում Գերմանիայի երկրորդ Բունդեսլիգայում և հուսանք, որ այս հարձակվողը կկարողանա ի վերջո գտնել իր տեղը նաև Հայաստանի ազգային հավաքականում: Մալաքյանը և Իշխանյանը լավ տպավորություն էին թողել հավաքականի վերջին հանդիպումներին և ունեն հնարավորությունը դառնալու հիմնական կազմի խաղացողներ: Ինչ վերաբերվում է դարպասապահ Արամ Հայրապետյանին, ապա վերջինս հաջող է խաղում Հայաստանի Բարձրագույն խմբի առաջնությունում:
Հայրապետյանը լավ հնարավորություն ունի դրսևորվելու միջազգային ասպարեզում: Էստոնիայի հավաքականը դավանում է ուժային ֆուտբոլ, որը դրսևորվում է երկար՝ բարձրից կատարվող փոխանցումներով: Այս հանդիպումը կարծում ենք հնարավորություն կտա իրական կարծիք կազմելու օդային փոխանցումների ժամանակ դարպասապահի խաղի վերաբերյալ: Հայ դարպասապահների մոտ խնդրահարույց է հատկապես դարպասից դուրս գալը օդային փոխանցումների ժամանակ: Հնարավոր է, որ խաղաժամանակ ստանա նաև «Փյունիկի» դարպասապահ Գոռ Մանուկյանը:
Հայաստան-Էտոնիա հանդիպումը կսկվի ժամը 18-ին:
Լուսանկարը՝ ՀՖՖ-ի պաշտոնական կայքի