«Ակնհայտ է, որ իշխանությունները ճիգեր են գործադրում՝ ինչ-որ ձևով խափանելու, տապալելու այն ալիքը, որը մենք փորձում ենք բարձրացնել իրենց գործողությունների նկատմամբ, բայց մանկամիտ քայլեր են անում։ Մարդիկ չեն ուզում հասկանալ, որ խնդիրը ամենևին այս կամ այն գործչի՝ մեկ այլ գործչի նկատմամբ վերաբերմունքի հետ չի կապված։ Խնդիրը շատ ավելի լուրջ է։ Բոլոր ոլորտներում տապալված Սերժ Սարգսյանը և իր ղեկավարած հանցախումբը, որը կոչվում է ՀՀԿ, փորձում է ամեն գնով իր իշխանությունը հավերժացնել մեր երկրում: Եվ սա մեզ համար անընդունելի է»,- «Առաջին լրատվական»-ի հետ զրույցում ասաց ԱԺ նախկին փոխնախագահ, «Հանուն Հայաստան պետության» ճակատի անդամ Կարապետ Ռուբինյանը՝ հավելելով, որ այս մարդիկ մեր երկիրը կործանման են տանում։
Կարապետ Ռուբինյանի խոսքով՝ եթե հաջողվի խափանել Սերժ Սարգսյանի ծրագիրը, ապա դա կնշանակի խափանել հանցախմբի վերջին 3-4 տարվա նպատակային ծրագիրը, որը իրականացնում են։ Եվ եթե դա հաջողվի ժողովրդի օգնությամբ, ապա կնշանակի, որ ժողովուրդը ցույց տվեց իր ուժը, և կպարտադրի իր հաջորդ քայլերը։
Ամբողջությամբ՝ տեսանյութում։