Երեկ «Սասնա ծռերի» գործով դատական նիստի ժամանակ մեղադրող դատախազների հրապարակած մուտքային և ելքային խոսակցությունների գաղտնալսումների վերծանումների հրապարակումից հայտնի դարձավ, որ ՊՊԾ գնդի գրավման օրերին ԳԱԼԱ-ն է լիցքավորել «Սասնա ծռեր» խմբի անդամների հեռախոսահամարները՝ 6-8 հազար դրամ: Մասնավորապես, գաղտնալսվել է Անահիտ անունով մի կնոջ և «Սասնա ծռերից» Տիգրանի միջև հեռախոսների լիցքավորման մասին խոսակցությունը:
ԳԱԼԱ-ի հիմնադիր, սեփականատեր Վահան Խաչատրյանը «Առաջին լրատվական»-ի հետ զրույցում, սակայն, հերքեց, թե իրենք լիցքավորել են «Սասնա ծռերի» անդամների հեռախոսները։ «Լրատվական կառույցի մեր այն աշխատակիցներից, ովքեր այդ օրերին մշտական կապի մեջ էին «Սասնա ծռեր» խմբի անդամների հետ, ես ճշտել եմ, որ այդ օրերին հեռախոս լիցքավորելու կարիք ամենևին չի առաջացել, որովհետև, որպես կանոն, մեր հեռախոսներից են զանգեր կատարվել»,- ի պատասխան մեր գրավոր հարցմանը՝ ասաց Վահան Խաչատրյանը՝ հավելելով. «Իրավապահ մարմինները շատ լավ գիտեն՝ իրականում լիցքավորում եղել է, թե ոչ, և եթե եղած լիներ, ուրեմն փաստարկված հանդես կգային, այլ ոչ թե իշխանությունների կողմից ուղղորդվող ԶԼՄ-ների միջոցով նույնաբովանդակ, մանիպուլյատիվ վերնագրերով ինֆորմացիոն արտահոսք կկազմակերպեին»:
ԳԱԼԱ-ի սեփականատերը այս տեղեկությունը հրապարակայնացնելը Սերժ Սարգսյանի կողմից իրենց ուղված ուղերձ է համարում։ «Սա պարզապես Սերժ Սարգսյանի ուղերձն էր մեզ, պարզունակ մի ակնարկ, որ ԳԱԼԱ-ն ևս կարող է ներքաշվել գործի մեջ: Այս ամենը կապված է ԳԱԼԱ-ի հրապարակումների հետ, մասնավորապես՝ «ՀՀ քաղաքացին 7 օր ժամանակ ունի՝ հասնելու շրջադարձային փոփոխությունների» հոդվածի: Նա փորձեր է անում կանխելու իր իշխանությանը սպառնացող հնարավոր բոլոր վտանգները: Առհասարակ, երկչոտ, թուլասիրտ մարդը փորձում է հասարակության մեջ սերմանել վախի մթնոլորտ:
Այդ շարքից է նաև Լևոն Բարսեղյանի որդու հետ կապված միջադեպը: Նույն շարքից է նաև Բաղրամյան 26-ի կողմից ուղղորդվող լրատվամիջոցների գործունեությունը, երբ այս փուլում տարբեր հարցազրույցների միջոցով փորձում են մարդկանց տրամադրությունները շոշափելով՝ նպաստել այդ մթնոլորտի ձևավորմանը»,- եզրափակեց Վահան Խաչատրյանը: