«Այս բանավեճը մեր մեջ կար դեռ «Սասնա ծռեր»-ի գործողության ժամանակ։ Տարբեր մոտեցումներ են, պարզապես կարող եմ ասել, որ մեր ճակատին բռնություն գրված չէ, ոչ մեկս բռնության կողմնակից չենք։ Եվ ես չեմ կարծում՝ ճակատի մարդիկ, ովքեր հանդես են գալիս հարթակից, բռնությանը հակված մարդկանց տպավորություն են թողնում»,- «Առաջին լրատվական»-ի հետ զրույցում ասաց «Հանուն Հայաստան պետության» ճակատի անդամ Արմեն Հովհաննիսյանը՝ անդրադառնալով Նիկոլ Փաշինյանի հայտարարած մերկ ձեռքերով պայքարին։
Նրա խոսքերով՝ բռնությանը կարելի է բռնությամբ պատասխանել հիպոթետիկ․ «Կարող են լինել տարբեր հանգամանքներ, երբ չպատասխանելը ճիշտ է արյունահեղությունը կանխելու համար, բայց որևէ սկզբունքային խոչընդոտ ես՝ Հովհաննիսյան Արմենս, չունեմ բռնության դեմ բռնությամբ պատասխանելու հարցում։ Սա ինձ համար շատ նորմալ երևույթ է, սա նաև դաստիարակության, մտածելակերպի և աշխարհայացքի խնդիր է»,- ասաց նա։
Արմեն Հովհաննիսյանը համոզված է, որ կամուրջները այրված չեն ՔՊ-ի հետ․ «Ես հավատում եմ, որ նրանք նույնպես նույն նպատակն ունեն։ Ես գտնում եմ, որ Սերժ Սարգսյանի վերարտադրությունը կանխելն ազգային տոն է լինելու և ուրախություն։ Ես կարծում եմ, որ մենք մեր ջանքերը պետք է համադրենք, համոզված եմ, որ կամուրջներն այրված չեն»,- հավելեց նա։
Ամբողջությամբ՝ տեսանյութում։