Մարտի 18-ին լրացավ Ալավերդիում հայտնի քրեական հեղինակություն Վահագն Աբգարյանի՝ Ալավերդցի Վահագի և նրա ընկերոջ՝ Արթուր Մնացականյանի՝ Արկոյի կալանավորման ժամկետը։ Նախաքննական մարմինն այս գործով կալանավորվածներից բոլորի համար, բացառությամբ Արկոյի, կալանքի երկարացման միջնորդություն է ներկայացրել դատարան։
Արկոյի կալանքը չերկարացնելու հանգամանքը շատ ուշագրավ է, քանի որ այս գործի շրջանակներում միակ ցուցմունք տված անձը հենց նա է։ Հենց Արկոն է ցուցմունք տվել իր ընկերոջ՝ Ալավերդցի Վահագի դեմ, նա է ցուցմունք տվել նաև Թաթուլ Շուշանյանի դեմ՝ նշելով, որ 5000 դոլար կաշառք, Վահագի հրահանգով, ինքն է փոխանցել Շուշանյանին։ Բացի այդ, հենց Արկոն է ցուցմունք տվել նաև նախօրեին կալանավորված քննիչ Արտակ Հովհաննիսյանի դեմ։ Մասնավորապես, Արկոն իր ցուցմունքում նշել է, որ քննիչին, Վահագի հրահանգով, 500 ԱՄՆ դոլար է փոխանցել։ Այսինքն՝ ստացվում է, որ Արկոն բոլորի դեմ ցուցմունք է տվել և հիմա, հնարավոր է, հայտնվի ազատության մեջ։ Իսկ Արկոյի ազատության մեջ հայտնվելը շատ վտանգավոր կլինի նրա համար։ Նրա կյանքին մի քանի ուղղությամբ վտանգ է սպառնալու, հաշվի առնելով, թե քանի անձի դեմ է ցուցմունք տվել։
Մյուս կողմից, սակայն, եթե Արկոն հայտնվի ազատության մեջ, ապա նախաքննական մարմինը լուրջ խնդիր կունենա Ալավերդցի Վահագին առաջադրված հանցավոր համագործակցություն ստեղծելու մեղադրանքը հիմնավորելու հարցում, քանի որ մեկ հոգանոց հանցախումբ պատկերցնելը մի քիչ դժվար է։
Հիշեցնենք, որ Վահագն Աբգարյանին մեղադրանք է առաջադրվել՝ հանցավոր համագործակցություն ստեղծելու և ղեկավարելու (ՀՀ քրեական օրենսգրքի 223-րդ հոդվածի 1-ին մաս), Կամո Փիրուզյանի սպանությունը կազմակերպելու (ՀՀ քրեական օրենսգրքի 38- 104-րդ հոդվածի 2-րդ մասի 7-րդ և 8-րդ կետերով) և Ռ. Մոսինյանի սպանության նախապատրաստությունը կազմակերպելու համար (ՀՀ քրեական օրենսգրքի 38-35-104-րդ հոդվածի 2-րդ մասի 7-րդ և 8-րդ կետերով)։
Իսկ Արթուր Մնացականյանին՝ Արկոյին մեղադրանք է առաջադրվել՝ հանցավոր համագորցակցությանը մասնակցելու, Փիրուզյանի սպանության և Ռ. Մոսինյանի սպանության նախապատրաստության կազմակերմանն օժանդակելու, Ա. Հարությունյանին՝ հանցավոր համագործակցությանը մասնակցելու և Ռ. Մոսինյանի սպանության նախապատրաստության, Մ. Ռամազյանին՝ հանցավոր համագործակցությանը մասնակցելու և ապօրինի կերպով պայթուցիկ նյութեր ձեռք բերելու և պահելու համար։ Արկոյի այս մեղադրանքները ենթադրում են 8-10 տարի պատիժ, մինչդեռ, նա կարող է այլոց դեմ ցուցմունք տալու համար հայտնվել ազատության մեջ։
