Քաղաքական մեկնաբան Արմեն Բաղդասարյանի կարծիքով՝ Սերժ Սարգսյանի վարչապետ դառնալու որոշումից մեծ դժգոհություն կա, բայց խնդիրն այն է, թե քաղաքական ուժերը կկարողանան կապիտալիզացնել այդ դժգոհությունը. «Այս պահի դրությամբ այդպիսի ռեսուրս չկա, բայց «Քաղաքացիական պայմանագիրը», որքանով տեղյակ եմ, 14+4 քարտեզ է մշակել և դա կարող է ձնագնդի ազդեցություն ունենալ։ Շուրջօրյա հանրահավաքները համախմբելու հատկություն ունեն, բայց չգիտեմ՝ իշխանությունները դա կհանդուրժե՞ն, թե՞ ոչ»,- «Առաջին լրատվական»-ի հետ զրույցում ասաց Բաղդասարյանը։
Մեր զրուցակիցն անդրադրձավ նաև ՀԱԿ փոխնախագահ Լևոն Զուրաբյանի այն հայտարարությանը, որ իրենք այս փուլում պայքարին չեն միանա, որովհետև պայքարել պետք էր սահմանադրական փոփոխությունների ժամանակ. «Կարծում եմ՝ Լևոն Զուրաբյանը ճիշտ էր ասում՝ պայքարել պետք էր այն ժամանակ, բայց նաև դա չի նշանակում, որ հիմա պայքարել պետք չէ։ Հասկանում եմ, որ հիմա շանսերը քիչ են։ Եթե կա ընդդիմադիր ուժ, որը դուրս է գալիս պայքարի, ցանկալի կլինի, որ մյուսները միանան ու համախմբվեն նույն նպատակի շուրջ։ Հասկանում եմ, որ ՀԱԿ-ը ՔՊ-ին չի միանա, բայց կարող են նպատակին ու ծրագրին միանալ»,- ընդգծեց նա։
Ինչ վերաբերում է Նիկոլ Փաշինյանի ու «Հանուն Հայաստան պետության» ճակատի հնարավոր համագործակցությանը, մեր զրուցակիցն ընդգծեց. «Հասկանալի է, որ որպես քաղաքական ուժ, «Քաղաքացիական պայմանագիրը» դեմ է զենքով հարց լուծելուն, ինչպես որ ամրագրված է Սահմանադրության մեջ։ Չեմ կարծում, որ մյուս կողմը զենքի կիրառմամբ կարող է հաջողության հասնել։ Ես շատ կզարմանայի, եթե այդ երկու թևերը միանային՝ ունենալով այդպիսի տարաձայնություն։ Մենք խոսում ենք քաղաքական պայքարի և ապստամբության մասին։ Խնդիրը ապստամբության իրավունքը չէ, այո՛, ցանկացած ժողովուրդ ունի ապստամբության իրավունք, բայց դա այլ հարց է, իսկ քաղաքական մեթոդներով պայքարը՝ այլ հարց է։ Դրանք չենք մեկտեղվում»։
Հարցազրույցն ամբողջությամբ՝ տեսանյութում։