Facebook սոցկայքը կրեց ամենազգալի տնտեսական և իմիջային կորուստը՝ իր ստեղծման պահից ի վեր։ Շուրջ 2 օրում ընկերության կապիտալիզացիան նվազեց 65 մլրդ դոլարով։ Դա տեղի ունեցավ սկանդալից հետո, երբ պարզվեց, որ Facebook-ի շուրջ 50 մլն օգտատերերի անձնական տվյալներ հայտնվել են վերլուծական Cambridge Analytica ընկերության ձեռքում, որը համագործակցում էր Դոնալդ Թրամփի նախընտրական շտաբի հետ։ Օգտատերերի մասին տեղեկությունը հավաքել օգնել է ՌԴ-ն։ Բացի այդ, հայտնի է դարձել, որ պաշտոնից հեռացվել է Facebook-ի թոփ-մենեջերը, ով կոչ էր անում գաղտնազերծել տվյալներն այն մասին, թե ինչպես էին ռուսական իշխանությունները փորձում ազդել ամերիկացի ընտրողների վրա։ Կոնգրեսականները պահանջում են Facebook-ի հիմնադիր Մարկ Ցուկերբերգին կանչել ցուցմունք տալու։
Կոնգրեսականները ցանկանում են նրանից լսել, թե ինչպես սոցկայքը կարող էր օգտագործվել՝ 2016-ին ԱՄՆ-ում ընտրությունների նախօրեին ընտրողներին մանիպուլյացիայի ենթարկելու համար։
Առաջին հետաքննությունից պարզ դարձավ, որ ԱՄՆ ավելի քան 50 մլն օգտատիրոջ տվյալներ հայտնվել են Cambridge Analytica ընկերության ձեռքում, որը մասնագիտացված է Big Data (մեծ տվյալներ) հետազոտությունների, քաղաքական հոգեբանության և համացանցում նախընտրական քարոզարշավներ անցկացնելու ուղղությամբ։ Cambridge Analytica-ի տնօրենների խորհրդի անդամ է Դոնալդ Թրամփի նախկին խորհրդական Սթիվեն Բենոնը, իսկ գլխավոր ներդրողներից է նրա ընկերության հայտնի դոնորներից, մուլտիմիլիոնատեր Ռոբերթ Մերսերը։ Cambridge Analytica-ի կայքում ասվում է, որ սոցկայքերի օգտատերերի հետ աշխատանքը ԱՄՆ գործող նախագահին օգնել է շրջանցել դեմոկրատ թեկնածու Հիլարի Քլինթոնին։
Facebook-ի օգտատերերի անձնական տվյալները Cambridge Analytica-ն հավաքել է Քեմբրիջի համալսարանի գիտնական Ալեքսանդր Կոգանի մասնակցությամբ մշակված հավելվածի միջոցով։ Մշակողը պնդում է, թե չի իմացել՝ ինչպես Cambridge Analytica-ը կվարվի տեղեկության հետ։
Facebook-ում հայտարարել են, որ դադարեցրել են Cambridge Analytica-ի հետ համագործակցությունը։ Ամերիկյան լրատվամիջոցները վկայում են, որ Դոնալդ Թրամփի նախընտրական շտաբը ընկերության ծառայությունների համար ավելի քան 15 մլն դոլար է վճարել։ Օրինակ՝ աֆրոամերիկացիներին ցույց են տվել տեսագրություններ, որտեղ Հիլարի Քլինթոնը քննադատում է սևամորթներին։
Երկրորդ հետաքննությունից պարզ դարձավ, որ իր պաշտոնից զրկվել է Facebook-ի՝ տեղեկատվական անվտանգության գծով տնօրեն Ալեքս Սթամոսը, որը պահանջում էր բացահայտել, թե ինչպես են ռուսական իշխանությունները փորձում ազդել ամերիկյան ընտրողնների վրա։
Կորուստներից խուսափել չհաջողվեց։ Երկու օրում Facebook-ի կապիտալիզացիան նվազել 65 մլրդ դոլարով, իսկ բաժնետոմսերի արժեքը նվազել է ավելի քան 12 տոկոսով։
