Լուրեր
Թափանցիկությունը խանգարելու է հանքարդյունաբերողներին․ քննարկում ԱԺ տնտեսական հանձնաժողովում
  • 18:21
  • 2018-03-19
  • Դիտումներ՝ *

ՀՀ ԱԺ տնտեսական հարցերի մշտական հանձնաժողովը Խոսրով Հարությունյանի նախագահությամբ հրավիրած նիստում քննության է առել վիճակագրության եւ ընդերքի ոլորտներին առնչվող օրենսդրական նախաձեռնություններ:

«Պաշտոնական վիճակագրության մասին», «Հայաստանի Հանրապետությունում ստուգումների կազմակերպման եւ անցկացման մասին» ՀՀ օրենքում փոփոխություններ կատարելու մասին», «Վարչական իրավախախտումների վերաբերյալ ՀՀ օրենսգրքում փոփոխություններ կատարելու մասին», «ՀՀ կենտրոնական բանկի մասին» ՀՀ օրենքում փոփոխություն կատարելու մասին», «Գրադարանների եւ գրադարանային գործի մասին» ՀՀ օրենքում փոփոխություն կատարելու մասին» օրենսդրական փաթեթը երկրորդ ընթերցմամբ քննարկման է ներկայացրել ՀՀ ազգային վիճակագրական ծառայության նախագահ Ստեփան Մնացականյանը:

Տասներկու գլխից, 36 հոդվածից բաղկացած «Պաշտոնական վիճակագրության մասին» նոր օրենքի նախագծով փորձ է արվում կարգավորել ՀՀ ազգային վիճակագրական համակարգի ձեւավորման, պաշտոնական վիճակագրության մշակման, արտադրման եւ տարածման, համատարած հաշվառումների անցկացման հետ կապված հարաբերությունները:

Նախագծով սահմանվում է նաեւ պատասխանատվություն՝ ոչ արժանահավատ, ոչ ամբողջական, աղավաղված վիճակագրական հաշվետվությունների տարածման ու մատուցման համար:

Ըստ հիմնական զեկուցողի՝ առաջինից երկրորդ ընթերցում ընկած ժամանակահատվածում միայն կառավարությունն է ներկայացրել խմբագրական բնույթի առաջարկություններ, որոնք ներառվել են օրենսդրական փաթեթում:

«ՀՀ ընդերքի մասին օրենսգրքում փոփոխություն եւ լրացումներ կատարելու մասին», «Վարչական իրավախախտումների վերաբերյալ ՀՀ օրենսգրքում լրացումներ կատարելու մասին», «ՀՀ հարկային օրենսգրքում լրացում կատարելու մասին» օրենսդրական փաթեթը երկրորդ ընթերցմամբ քննարկման է ներկայացրել ՀՀ էներգետիկ ենթակառուցվածքների եւ բնական պաշարների նախարարի տեղակալ Վարդան Գեւորգյանը:

Նշվել է, որ առաջարկվող փոփոխությունների հիմնական նպատակն է ընդերքօգտագործման հետ կապված գործունեության հրապարակայնության ապահովումը:

Առաջինից երկրորդ ընթերցում ընկած ժամանակահատվածում կառավարության ներկայացրած առաջարկությունները խմբագրական բնույթի են եղել:

Հանձնաժողովը դրական եզրակացություն է տվել քննարկված փաթեթներին՝ հերթական նիստերի օրակարգի նախագծում ընդգրկվելու համար:

  • Դիտումներ՝ *