Ես մշտապես և այսուհետ ավելի հաճախ լինելու եմ ձեր կողքին՝ ԶՈՒ օպերատիվ հավաքի ընթացքում բանակի ղեկավարության ու հրամկազմի առաջ հայտարարել է Սերժ Սարգսյանը: Պարբերաբար տեղի ունեցող հավաքի ընթացքում ունեցած իր ելույթում Սարգսյանը խոսել է բանակի արդիականացման յոթամյա ծրագրի, Արցախյան խնդրի, բանակի դերակատարության, Ադրբեջանին զսպելու, կանխարգելիչ հարված հասցնելու կարողության և անհրաժեշտ սպառազինության, միաժամանակ բանակում կոռուպցիայի դեմ պայքարի և կարգապահության բարձրացմանն ուղղված քայլերի կարևորության մասին:
Մշտապես և այսուհետ ավելի հաճախ բանակի կամ հրամկազմի կողքին լինելու մասին նրա հայտարարությունը, այդուհանդերձ, այդ ամենի համատեքստում թերևս գրավում է ամենամեծ ուշադրությունը՝ բնականաբար, 2018 թվականի ապրիլին վարչապետի խնդրի շրջանակում: Սարգսյանը չի որոշակիացնում, թե ի՞նչ կարգավիճակում է այսուհետ ավելի հաճախ լինելու բանակի կամ բարձրագույն հրամկազմի կողքին: Դա լինելու է վարչապետի՞ կարգավիճակը, թե՞ այլ կարգավիճակ, օրինակ՝ պաշտպանության նախարարի, ինչի հավանականության մասին վերջին շրջանում մամուլում եղել են տեղեկություններ:
Այդուհանդերձ, թերևս չկա կարիք ավելորդ անգամ անդրադառնալու հնարավոր սցենարներին, որ կարող են լինել ապրիլի համար: Մյուս կողմից՝ օպերատիվ հավաքի ընթացքում Սերժ Սարգսյանի ելույթը գործնականում հերթականն էր նախագահության ավարտին, որ իր մեջ պարունակում էր ծրագրային, ուղենիշային դրույթներ և բովանդակություն, տոնայնություն, կամ ինչպես ընդունված է ասել՝ այն չէր թողնում իշխանությունից հեռացող մարդու տպավորություն:
Այդ հանգամանքը ավելի է խորացնում նույն հավաքի ընթացքում ներկայիս վարչապետ Կարապետյանի ունեցած ելույթը, որը հիշեցնում էր ոչ թե քաղաքական կամ պետական գործչի ելույթ, որը կարող է մնալ առաջին դեմքի կարգավիճակում, այլ ավելի շուտ՝ ֆինանսիստի կամ տնտեսվարի, որը ներկայացնում է զուտ տնտեսական հաշվետվություն բանակի համար:
Մյուս կողմից՝ փաստն այն է, որ Սերժ Սարգսյանը հերթական անգամ չի որոշակիացնում իր կարգավիճակը, որ կարող է ունենալ նախագահի ընտրությունից հետո, և ավելին՝ նա ունենում է ելույթ, որը գործնականում ավելի շատ կարող է լինել երկխոսություն արտաքին ուժային կենտրոնների հետ:
Ընդ որում, հատկանշական է, թե ինչ փուլում է հնչում այդ ելույթը: Ռուսաստանում ավարտվել է նախագահի ընտրությունը, ու Պուտինը վերընտրվել է այդ պաշտոնում, ու պարզ չէ, թե հատկապես ում է նա պարտական այդ 80 տոկոսի համար, և ով է իրական իշխանությունը Ռուսաստանում՝ Պուտինի դեմքով, և ըստ այդմ՝ այդ իշխանությունն ինչպես է նայում Հայաստանին, և ում հետ է գործ ունենալու ինքը՝ Սերժ Սարգսյանը: Միացյալ Նահանգները նշանակում է նոր արտգործնախարար, որը լինելու է կոշտ պահպանողական, բազեական Մայք Պոմպեոն, որը մինչ այդ ոչ թե դիվանագետի, այլ հատուկ ծառայության ղեկավարի՝ ՑՌՈՒ տնօրենի կարգավիճակն է ունեցել: Ծավալվում է աղմկոտ դիմակայությունը Մեծ Բրիտանիայի և Ռուսաստանի միջև, որը Արևմուտք-Ռուսաստան դիմակայության նոր ալիքն է:
Միաժամանակ ԱՄՆ կարևոր այցեր են կատարում Հայաստանի խորհրդարանի պատվիրակությունն ու Արցախի նախագահ Բակո Սահակյանը: Ինչ ազդակներ է ստացել այդ այցերից Սերժ Սարգսյանը, և ինչքանով են դրանք ազդել օպերատիվ հավաքի ընթացքում հնչած ելույթի բովանդակության ու մեսիջների վրա: Օպերատիվ հավաքը այս դեպքում Սերժ Սարգսյանի համար թերևս ավելի շատ առիթ է՝ այդ ազդակները հղելու կամ արտաքին զարգացումներից ստացված մեսիջները ի մի բերելու և օպերատիվ պատասխանելու համար, որովհետև Սարգսյանը ժամանակ չունի, և առաջիկա երկու-երեք շաբաթներին նա պետք է կայացնի կարևոր որոշում, ըստ այդմ՝ ինտենսիվ երկխոսության մեջ է արտաքին ուժային կենտրոնների հետ:
Ամենևին պատահական չէ, որ այդ ամենին զուգահեռ՝ տեղեկություն տարածվեց, որ Հայաստանի խորհրդարանը ԵՄ-Հայաստան համաձայնագիրը կվավերացնի հավանաբար ապրիլի 10-ին, երբ Սերժ Սարգսյանն արդեն մեկ օր դե յուրե չի լինի նախագահ և հասցրած չի լինի նշանակվել վարչապետ:
