Ֆուտբոլի Հայաստանի ազգային հավաքականի գլխավոր մարզիչ Արթուր Պետրոսյանը նախօրեին հրապարակեց այն ֆուտբոլիստների անունները, որոնք ստացել են նախապատրաստական հավաքին մասնակցելու հրավեր:
Հիշեցնենք, որ մեր հավաքականը մարտի 24-ին Երևանում կմրցի Էստոնիայի, իսկ մարտի 27-ին՝ Լիտվայի ազգային հավաքականի հետ: Վնասվածքի պատճառով առաջիկա հանդիպումներին չի մասնակցի Ղազախստանի «Ակտոբեի» կիսապաշտպան Մարկոս Պիզելին: Հավաքականին չի միանա նաև կոլումբիական «Բրիակա Չիկո» թիմի պաշտպան Ժոաո Ժ֊ոդի Մոնրո Արարատը: Ակումբի ղեկավարությունը խնդրել է Հայաստանի ֆուտբոլի ֆեդերացիային թույլ տալ ֆուտբոլիստին չմասնակցել առաջիկա հավաքին: Սպասվում է, որ առաջին անգամ Հայաստանի հավաքականի մարզաշապիկը կկրի արգենտինական «Ատլետիկո Ուրականի» հարձակվող Նորբերտո Բրիասկո Բալեկյանը:
Ընկերական այս հանդիպումները Արթուր Պետրոսյանի համար հնարավորություն են լուրջ փոփոխություններ կատարելու, ինչպես նաև ձևավորելու մեր ազգային թիմի կորիզը, որը ի զորու կլինի պայքարել Ազգերի լիգայի խաղարկության փլեյ-օֆի ուղեգրի համար: Կարծում ենք՝ պարզ է, որ հավաքականում առանց լուրջ կադրային փոփոխությունների հնարավոր չի լինի լուրջ հաջողություններ գրանցել: Նախորդ տարի Պետրոսյանը շարունակ փոխում էր հիմնական կազմը, բայց…
Այս անգամ հայկական թիմերից Պետրոսյանը հրավիրել է 11 ֆուտբոլիստների: Հրավիրելով Բրիասկոյին և Արարատին՝ Հայաստանի հավաքականի գլխավոր մարզիչը փորձում է կարգավորել խաղը պաշտպանությունում և հարձակման գծում: Փորձենք հասկանալ, թե հրավիրված ֆուտբոլիստներից որոնք կարող են թարմացնել հավաքականի խաղը կամ, ինչպես ասում էր Պետրոսյանը, նոր արդյունք հաղորդել թիմին:
Այսօր մեր հավաքականն ունի երկու բարձրակարգ և հուսալի պաշտպաններ՝ ի դեմս Վարազդատ Հարոյանի և Հովհաննես Համբարձումյանի: Մյուս պաշտպանների խաղը կայուն չես անվանի, ինչի վկայությունը նախորդ տարի գրանցված արդյունքներն էին: Հրավիրված ֆուտբոլիստներից Արթուր Քարտաշյանը՝ «Փյունիկից», և «Շիրակի» ներկայացուցիչ Ռոբերտ Դարբինյանը ունեն հնարավորություն դրսևորվելու և դառնալու հիմնական կազմի ֆուտբոլիստներ: Քարտաշյանն ու Դարբինյանը լավ տպավորություն են թողնում Հայաստանի առաջնությունում և իրենց թիմերում առանցքային խաղացողներ են: Տեղացի ֆուտբոլիստներից լավ տպավորություն է թողնում նաև «Բանանցի» կիսապաշտպան Ռումյան Հովսեփյանը: Կարծում ենք՝ այս ֆուտբոլիստը դաշտի կենտրոնական հատվածում համագործակցելով Հենրիխ Մխիթարյանի հետ՝ կարող է գրոհներին սրություն հաղորդել: Հովսեփյանը բավական հաջող խաղաց նախորդ տարվա նոյեմբերին Երևանում տեղի ունեցած Բելառուսի հետ ընկերական հանդիպման ժամանակ:
Հույսեր է ներշնչում նաև «Փյունիկի» մեկ այլ ներկայացուցիչ՝ Էրիկ Վարդանյանը, որը Բելառուսի հետ խաղում նորամուտը նշանավորել էր տպավորիչ գոլով: Նախորդ շրջափուլում մեր հավաքականի ավագ Հենրիխ Մխիթարյանի խաղն այն մակարդակի վրա չէր, որն ակնկալում էին երկրպագուները: Հատկապես Լեհաստանի և Դանիայի հետ երևանյան հանդիպումներից հետո Մխիթարյանը լուրջ քննադատության ենթարկվեց: Ավելին, մեր ավագը հայտարարեց, որ անհաջողությունների գլխավոր մեղավորն ինքն է:
Հիմա Արթուր Պետրոսյանի գլխավոր խնդիրներից է Մխիթարյանի համար արդյունավետ գործելու պայմաններ ստեղծելը: Ավելի ստույգ՝ պետք է խաղադաշտում լինեն այնպիսի խաղացողներ, որոնք կօգնեն մեր հավաքականի ավագին դրսևորելու վարպետությունն ու ներուժը: Խոսքը միայն կիսապաշտպանների մասին չէ:
Անցյալ տարի Մխիթարյանը ակտիվ կերպով համագործակցում էր Պիզելիի հետ: Առաջիկա հանդիպումներում Մարկոսի բացակայության դեպքում, կարծում ենք, Մխիթարյանը կփորձի խաղալ մեկ այլ փորձառու կիսապաշտպան Գևորգ Ղազարյանի հետ, որը մեկ տարվա ընդմիջումից հետո նորից կխաղա Հայաստանի ազգային թիմում: Ի դեմս Ղազարյան-Մխիթարյան խաղային զույգի՝ մեր հավաքականն ունի ուժեղ մի օղակ: Հուսանք, որ հավաքականի նորեկը՝ Բրիասկոն, առջևի գծում կկարողանա ակտիվություն ստեղծել:
Մյուս հարձակվողները՝ Սարգիս Ադամյանն ու Տիգրան Բարսեղյանը, նախորդ շրջափուլում ոչնչով աչքի չընկան, և նրանց հետ հույսեր կապելը, կարծում ենք, ճիշտ չի լինի: Հավաքականի համար կարևոր ֆիգուր է Արաս Օզբիլիսը, որը տեղափոխվելով մոլդովական «Շերիֆ»՝ բարելավում է մարզավիճակը:
Ինչ վերաբերում է դարպասապահի խնդրին, ապա այն շարունակում է մնալ բաց: Պետրոսյանն այս անգամ հրավիրել է երկու դարպասապահների՝ Արամ Հայրապետյանին՝ «Բանանցից», և Գոռ Մանուկյանին՝ «Փյունիկից»: Առաջիկա խաղերում Պետրոսյանն ըստ ամենայնի երկու դարպասապահներին էլ խաղալու հնարավորություն կտա: Բայց պետք է ընդունենք, որ Մանուկյանի և Հայրապետյանի վրա չի կարելի հույս դնել Ազգերի լիգայում: