Վարչապետի խոսքը էական ազդեցություն չունի․ Լիբանանահայ գործարարները տեղյակ են Հայաստանում տիրող իրավիճակից

Օրերս պաշտոնական այցով Լիբանանում էր գտնվում կառավարության ղեկավար Կարեն Կարապետյանը, ով լիբանանահայ գործարարների հետ հանդիպման ընթացքում ներկայացնելով Հայաստանի 2017թ.-ի տնտեսական աճը, ներմուծման-արտահանման ցուցանիշները՝ հայտարարեց նաև, որ Հայաստանում բիզնես անելը լինելու է շատ դյուրին ու շահավետ։

«Առաջին լրատվական»-ի հետ զրույցում անդրադառնալով վարչապետի այս հայտարարությանը՝ տնտեսագետ Վահագն Խաչատրյանը շեշտեց. «Լիբանանն ու Սիրիան ԽՍՀՄ տարիներին միշտ կապ են ունեցել Հայաստանի հետ, և առավել ևս 1990-ական թվականներից հետո այդ կապն ավելի շատ է եղել, և նրանք միշտ շատ լավ տեղյակ են Հայաստանի ներքին կյանքին՝ բոլոր առումներով: Համոզված եմ, որ նրանք վարչապետից էլ լավ են տեղյակ, թե Հայաստանում բիզնեսի համար ինչ իրավիճակ է տիրում, և չեմ կարծում, թե տվյալ դեպքում վարչապետի խոսքը կամ հայտարարությունն էական փոփոխություն կմտցնի նրանց նպատակների կամ ծրագրերի մեջ։ Կրկնում եմ՝ ի տարբերություն Սփյուռքի այլ գաղթօջախների՝ այս երկրների մեր հայրենակիցներն ավելի հարազատ և ծանոթ են եղել հայաստանյան կյանքին։

Սակայն մյուս կողմից՝ ես չեմ ժխտում, որ այսպիսի հանդիպումներ, իհարկե, պետք են, և ողջունելի է նաև, որ այսպիսի հանդիպումների ժամանակ այդ մարդկանց այսպիսի կոչեր են անում և փորձում են օտարերկրյա ներդրումներ բերել Հայաստան, բայց այլ խնդիր է, թե որքանով են հայաստանյան պաշտոնյաները պատասխանատու իրենց հայտարարությունների համար, որովհետև իրականում մեծ հարց է, թե ինչքանով են իրենք պատրաստ լուծելու այն մարդկանց հարցերը, խնդիրները, ովքեր գալիս են Հայաստան և տեսնում են, որ այն, ինչ որ իրենց նախապես խոսք են տվել կամ հայտարարել են բարձրաստիճան պաշտոնյաները, իրականում չկա, և իրականությունն այլ է, այսինքն՝ իրականությունն ու հայտարարությունները միմյանցից տարբերվում են, և հենց այստեղ ավելի վտանգավոր է հենց հիասթափության հանգամանքը»։

Տնտեսագետի դիտարկմամբ՝ հենց այս հանգամանքն է, որ խանգարում է Հայաստանի զարգացմանն ու ներդրումային դաշտի փոփոխմանը։

«Խնդիրն այն է, որ Հայաստանում պետք է բոլորի համար ապահովել հավասար մրցակցային դաշտ, որն այսօր չկա, և խոսքը վերաբերում է ինչպես դրսից եկած, օտարերկրյա ներդրողներին, այնպես էլ ներսի մարդկանց»։

Մանրամասները՝ տեսանյութում։