Երևանի «Արարատ» ֆուտբոլային ակումբը տարածել է հայտարարություն նշելով, որ գլխավոր մրցավար Սուրեն Բալիյանի կոպիտ սխալի հետևանքով թիմը միավորներ է կորցրել Հայաստանի բարձրագույն խմբի առաջնության 19-րդ տուրի «Շիրակի» հետ մրցավեճում:
«Այս անգամ կոպիտ սխալ թույլ տվեց «Արարատ»-«Շիրակ» խաղի գլխավոր մրցավար Սուրեն Բալիյանը, ով հանդիպման 2-րդ խաղակեսի սկզբնամասում (հաշիվը այդ պահին 0:0 էր) 11-մետրանոց հարված է նշանակում Արարատի դարպասին այն բանից հետո երբ «Շիրակի» ֆուտբոլիստի հարվածից գնդակը դիպչում է Արարատի պաշտպան Վարդան Արզոյանի մարմնին: Սակայն այդ դրվագում հանդիպման մրցավարը Արզոյանին դեղին քարտ է ցույց տալիս և մեր թիմի դարպասին նշանակում 11-մետրանոց հարված:
Խփած գնդակը, իհարկե, հոգեբանական ծանր կացության մեջ գցեց Արարատի ֆուտբոլիստներին և ազդեց հանդիպման ելքի վրա», ասված է հայտարարության մեջ:
Նշենք, որ Բալիյանի աչքի էր ընկել մարտի 7-ին տեղի ունեցած Հայաստանի գավաթի խաղարկության կիսաեզրափակչի «Շիրակ»-«Գանձասար-Կապան» խաղի ժամանակ: 32-րդ րոպեին Սուրեն Բալիյանը 11 մետրանոց հարված էր նշանակել «Գանձասար-Կապանի» դարպասին: Ու մինչ «Շիրակ»-ի ֆուտբոլիստները պատրաստվում էին իրացնել այն, Բալիյանը փոխել էր որոշումը՝ նշանակելով անկյունային:
«Գանձասար-Կապան»-ի ֆուտբոլիստները մի քանի րոպեում համոզել էին Բալիյանին չեղարկել նշանակված 11 մետրանոցը: