Գերմանական Die Welt թերթի լրագրող Դենիզ Յուջելը, ով վերջերս է ազատվել թուրքական բանտից, շնորհակալություն է հայտնել ԳՖՀ իշխանություններին իր ազատմանն ուղղված ջանքերի համար և միևնույն ժամանակ մեղադրել է նրանց Թուրքիայի նկատմամբ վարած քաղաքականության համար։ «Ես գտնում ե, որ Անգելա Մերկելի կառավարությունը կրկնակի անգամ դավաճանել է Թուրքիայի բոլոր առաջադեմ և դեմոկրատական ուժերին»,– հայտարարել է Յուջելը՝ Die Welt և Tageszeitung թերթերում տպագրված հարցազրույցում։
Լրագրողը որպես դավաճանություն է գնահատել գերմանական իշխանությունների դիրքորոշումը՝ Թուրքիայի ԵՄ մտնելու հարցում։
Երկրորդ դավաճանությունը նա համարում է Անգելա Մերկելի հանդիպումը Ռեջեփ Թայիպ Էրդողանի հետ 2015 թվականին՝ նախքան Թուրքիայում նախագահական ընտրությունները և փախստականների հետ կապված ճգնաժամի թեժ պահին։ «Դիվանագիտության տեսանկյունից՝ դա շատ տարօրինակ աջակցություն էր (էրդողանի կուսակցությանը) ընտրություններից առաջ»,– գտնում է Յուջելը։ Նրա խոսքերով, այդ պահին ԵՄ–ում չկար որևէ երկիր, որ ավելի լոյալ կվերաբերվեր Թուրքիային, քան Գերմանիան էր։ «Եվ դա առանց հաշվի առնելու ընդդիմության և ԶԼՄ–ների ներկայացուցիչների ձերբակալությունները»,– ավելացնում է լրագրողը։ ԳՖՀ կառավարության դիրքորոշումը փոխվել է միայն այն բանից հետո, երբ Թուրքիայի իշխանությունները ձերբակալել և բանտ են նստեցրել Յուջելին։