«Մի իմաստուն այսպիսի բան է ասել, որպեսզի իրականությունը փոխես դու պիտի կարողանաս ճանաչել իրականությունը, խորքային հասկանաս ինքը ինչու է այդպիսին։ Եթե դու ունես սխալ պատկերացում և եթե դու մտածում ես ահա այն մարդը, ով վերևում է նա է այս ամեն ինչի մեղավորը, մինչդեռ իրականում կան խորքային պատճառներ, որոնք եղել են այդ մարդու ծնվելուց առաջ, նշանակում է դու մոլորության մեջ ես, չես կարող այդ իրականությունը փոխել»։ Այս մասին «Առաջին լրատվական»-ի հետ զրույցում ասաց քաղաքական վերլուծաբան Արծրուն Պեպանյանը ՝ ընդգծելով, որ դասական քաղական ճանապարհով ընդդիմությունը հաջողության հասնել չի կարող, առաջին հերթին պետք է ճիշտ ախտորոշել խնդիրները, պետք է պատճառները փնտրել գտնել պատմության մեջ, նաև ժողովրդի մենթալիտետով պայմանավորված։
Վերլուծաբանի դիտարկմամբ՝ գլխավոր պատճառներից մեկը նաև այն է, որ 1990 թվականին հայ ազգն անցել է կապիտալիզմի, եթե որևէ հասարակություն անցնում է կապիտալիզմի, այն գլխիվայր շուռ է գալիս, ժողովրդի վատ որակով շերտը դառնում է փողատեր, բարձրանում վերև, նորմալ, բարոյական մարդիկ, իջնում են ներքև: Արծրուն Պեպանյանը ընդգծում է մենք սև գետերի միջև ենք, մեջքի վրա ընկած ենք։
«Պետք է փորձենք հասկանալ, թե որն էր պատճառը, որ 25 տարի մեր բոլոր քաղաքական ընդդիմադիր նախաձեռնությունները ջախջախվեցին։ Ես այն կարծիքին եմ, որ 1996 թ-ի դեպքերից հետո, երբ որ պարզվեց, որ ընտրություններով չի ստացվում նախագահ փոխել քաղաքական դաշտը պիտի հետևություններ աներ և մտածեր, թե որտեղ ենք սխալվել, կամ օրենքների առումով կամ, ժողովրդի առումով, բայց ցավոք սրտի դա չարվեց ու պարբերաբար կրկնվեց։ Ամենակարևոր հարցը, որի պատասխանը պիտի գտներ մեր քաղաքական դաշտը, որը այսօր էլ օրակարգում է՝ այն է, որ պետք է պարզել՝ որոնք են Հայաստանի այս իրավիճակի իրական պատճառները»,-շեշտեց նա։
Արծրուն Պեպանյանը ընդգծեց, որ եթե ընդդիմադիր շարժումները չգերազանցեն, Վազգեն Մանուկյանի շարժմանը, որը ևս պարտվեց, ապա հաղթելու, հեղափոխություն անելու շանս չունեն։
«Հայ ժողովրդի ներկա տրամադրվածությունը և իշխանությունների ուժային ռեսուրսը հաշվի առնելով ես այն կարծիքին եմ, որ եթե Հայաստանը մնա փակ, գրեթե չկա շանս որ ներքին ընդդիմադիր շարժում առաջանա , որը կկարողանա իշխանություններին հեռացնի։ Ներսում այդ հնարավորությունը չկա, ուրիշ բան եթե սկսեն դրսերից ինչ-որ ներարկումներ, հրահրումներ անել ։ Ներսի ռեսուրսով հեղափոխություն անել հնարավոր չէ, հնարվորություն, շանս կբացվի, եթե դրսից որոշակի ներարկում արվի, բայց դա ձեռնտու չէ մեզ, որովհետև ոչ ոք շահագրգռված չէ, որ հզոր Հայաստան ունենանք։ Դրա համար մենք պետք է բնատուր խելքը աշխատացնենք, որպեսզի հասկանանք ինչ պետք է անել, որ այս իրավիճակից դուրս գանք»,-ընդգծեց նա։
Մանրամասները՝ տեսանյութում
