Moody’s վարկանիշային գործակալությունը նվազեցրել է Վենեսուելայի ինքնիշխան վարկային վարկանիշը մինչև «C» մակարդակ՝ եղածներից ամենացածրը: Փաստացի, Վենեսուելան աշխարհի միակ երկիրն է, որն ունի նման ցածր վարկանիշ:
Վարկանիշային գործակալությունը նախազգուշացրել է Վենեսուելայի պարտատոմսերի սեփականատերերին՝ պատրաստ լինել կորուստների: Երկիրը գտնվում է ծանր տնտեսական իրավիճակում՝ 1,7 մլրդ դոլարի չափով ժամկետանց պարտքեր: 2017 թ. արդյունքներով՝ երկրում գնաճը գերազանցել է 4.000 %-ը, իսկ 2018 թվականին Արժույթի միջազգային հիմնադրամի գնահատականներով այն կարող է հասնել 13.000 %-ի:
Moody’s-ի տնտեսագետները նշում են, որ ԱՄՆ-ի պատժամիջոցների առկայության դեպքում Վենեսուելայի կառավարության կողմից վարկային պարտքերի վերակազմավորման շանսերը չնչին են: Հարկ է նշել, որ վարկային վարկանիշի կրճատման որոշումը ձևական բնույթ է կրում, քանի որ ներդրողները վաղուց դադարել են ակնկալել որևէ դրական զարգացում, որը թույլ կտա Վենեսուելայի կառավարությանը վերանայել պարտքերի գծով պարտավորությունների վճարումը:
