Ճարտարապետների պալատի անդամավճարը մեկ տարի ժամկետով սահմանվեց ամսական 2000 դրամ: Մարտի 17-ին Ճարտարապետների միության 19-րդ համագումարում որոշումը կայացվեց երկարատև քննարկումներից և առաջարկներից հետո:
Ճարտարապետ Բորիս Քոչարյանն առաջարկեց ամսական անդամավճարը սահմանել 2000, 3000 կամ 5000 դրամ: «Մոտավոր հաշվարկներով նույնիսկ 5000 դրամը դժվարությամբ կարող է բավարարել պահանջները»,-նշեց նա:
Պալատի անդամ Գրիգոր Ազիզյանի կարծիքով, թիվը շատ մեծ չպետք է լինի՝ մանավանդ չաշխատող մարդու համար, սակայն նաև կարևոր է, որ ձևավորվի բյուջե:
Ոմանք հարց բարձրացրին՝ անդամավճարի դիմաց պալատն իրենց ի՞նչ կտա:
«Այն, ինչ նախկինում միությունն էր տալիս: Նախատեսում ենք պալատում ստեղծել նաև ինֆորմացիոն կենտրոն, որը տեղեկատվություն կտրամադրի անդամներին: Պալատում ինֆորմացիայի հասանելիություն կլինի»,-պատասխանեց Ազիզյանը:
Նաև այլ մեխանիզմներ գտնելու առաջարկներ եղան: Ոմանք էլ առաջարկեցին յուրաքանչյուր անդամի համար որոշակի չափ սահմանել ամսական 5000-ի սահմաններում՝ կախված աշխատել-չաշխատելու և շատ այլ հանգամանքներից:
Այնուամենայնիվ, 196 անդամով անցկացված համագումարում ընդամենը 2 դեմ ձայնով որոշվեց մինչ հաջորդ տարի անդամավճարը սահմանել 2000 դրամ:
Ոմանք նաև բարձրացրեցին պալատի անդամների ապահովագրության անհրաժեշտության հարցը:
«Մենք հետամուտ կլինենք, որ հետագայում դա անպայման լինի»,-ասաց պալատի նախագահ Մկրտիչ Մինասյանը: