Ռուսաստանի Արտաքին գործերի նախարարությունը հաղորդում է, որ «վեցնյակի» երկրները ողջունել են Իրանի կողմից Համատեղ համապարփակ գործողությունների ծրագրի՝ այսպես կոչված միջուկային ծրագրի նկատմամբ պարտավորությունների անշեղորեն պահպանումը, որ ստորագրվել է 2015 թվականի հուլիսի 14-ին և հավանության արժանացել ՄԱԿ–ի Անվտանգության Խորհրդի N 2231 բանաձևով։ Ռուսաստանից բացի, վեցնյակի մեջ են մտնում նաև Մեծ Բրիտանիան, Գերմանիան, Չինաստանը, ԱՄՆ–ն և Ֆրանսիան։ Իրանի և «վեցնյակի» ներկայացուցիչների հանդիպումը կայացել է Վիենայում, որտեղ տեղակայված է Ատոմային էներգիայի միջազգային գործակալությունը։
Ռուսաստանի ԱԳՆ հաղորդագրության մեջ նշվում է, որ բացի Իրանի կողմից գործարքի պայմանների պահպանմանը, անհրաժեշտ է նաև որ մյուս երկրները նույնպես հետևեն այդ պայմաններին։
