Թուրքիայի մեջլիսում քրդամետ Ժողովուրդների դեմոկրատական կուսակցության անդամ պատգամավորներին պատգամավորական մանդատից զրկելու գործընթացը սկսել է իր ազդեցությունն ունենալ օրենսդիր մարմնի հանձնաժողովների աշխատանքի վրա:
Ինչպես հաղորդում է թուրքական Gazete Duvar լրատվամիջոցը, պատգամավորներ Նուրսել Այդողանի, Ահմեթ Յըլդըրըմի և Իբրահիմ Այհանի՝ պատգամավորական մանդատից զրկվելուց հետո քրդամետ կուսակցության անդամների թիվը մեջլիսի բյուջետային հարցերով հանձնաժողովում նվազել է 3-ի (Գարո Փայլան, Էրթուղրուլ Քյուրքչյու, Բեդիա Օզգյոքչե Էրթան): Ընդ որում, հեռացած պատգամավորների փոխարեն տեղեր են հատկացվել «Ազգայնական շարժում» կուսակցությանը:
Մեջլիսի հայազգի պատգամավոր Գարո Փայլանը, ով բյուջետային հանձնաժողովի անդամ է, իր դժգոհությունն է հայտնել հանձնաժողովում անդամակցելու իրենց իրավունքը ազգայնականներին փոխանցելու փաստի առնչությամբ: Հանձնաժողովի աշխատանքների ժամանակ նա ընդգծել է, որ Ահմեթ Յըլդըրըմը՝ խորհրդարանական խմբակցության իրենց նախկին ղեկավարը, ով հանձնաժողովում 1,5 տարի աշխատել էր, 15 օր առաջ զրկվեց մանդատից Էրդողանին «փադիշահ թափթփուկ» անվանելու համար: Նա հիշել է նաև հանձնաժողովում գտնվող Իբրահիմ Այհանին, ով ընդամենը սոցիալական ցանցում գրառման պատճառով զրկվեց մանդատից, քանի որ այդ գրառումը համարվեց «ահաբեկչության քարոզչություն»:
«Մենք այստեղ ժողովրդի կամքն ենք ներկայացնում: Եթե դուք ժողովրդի մի մասի կամքը ներկայացնող պատգամավորներին այսպիսի շինծու հիմնավորումներով զրկում եք պատգամավորությունից, ապա իմացեք, որ մի օր էլ նույնը տեղի կունենա ձեր պատգամավորների հետ»,- ասել է նա:
Դիմելով հանձնաժողովի՝ իշխող «Արդարություն և զարգացում» կուսակցությունը ներկայացնող նախագահին, նա հեգնել է՝ ասելով, թե պարզապես հիացած է այն փաստով, թե ինչ արագությամբ են հանվել իրենց պատգամավորների անունները կրող ցուցանակները:
