Սմիթսոնյան ինստիտուտի բնագիտության ազգային թանգարանի մարդաբանները պարզել են, որ հնադարյան մարդիկ, ովքեր ապրել են Արևելյան Աֆրիկայում 320 հազար տարի առաջ, օգտվել են գունավոր պիգմենտներից և բարդ գործիքներից, որոնք հատուկ չեն պալեոլիտի դարաշրջանին։
Գտածոները հայտնաբերվել են Քենիայի հարավային հատվածի Օլորգեսայլի տարածաշրջանում։ Այս տարածքում մարդու գոյության առաջին վկայությունները թվագրվում են 1,2 միլիոն տարի առաջվան։ Հնադարյան մարդիկ (Homo heidelbergensis և Homo erectus) օգտագործել են քարե հատիչներ՝ աշխատանքային քարե գործիք, որ օգտագործվում էր որպես կացին, դանակ և այլն։ Սակայն նոր գտածոները իրենցից ավելի մասնագիտացված և ավելի նուրբ պատրաստված գործիքներ են ներկայացնում, որոնց տարիքը 305-320 հազար տարեկան է։
Աշխատանքային որոշ գործիքներ պատրաստված են եղել օբսիդիանից, որոնց հանքավայրերը գտնվում էին պեղումների տարածքից 24-28 կմ հեռավորության վրա։ Դա ցույց է տալիս, որ Աֆրիկայում մարդկանց տարբեր խմբերի միջև առևտուր է գնացել։ Հայտնաբերվել են նաև մանգանեզի և դեղին կավաքարի բյուրեղներ, որոնք օգտագործվել են որպես ներկանյութ։
Գիտնականները նաև պարզել են, որ գտածոների տարիքը համապատասխանում է տարածաշրջանում կլիմայական անկայունության շրջանին։ Շրջակա միջավայրի փոփոխությունները, ըստ գիտնականների, նպաստել են հնադարյան մարդու տեխնոլոգիական և սոցիալական զարգացմանը, այդպիսով նրանք մեծացրել են ողջ մնալու հնարավորությունը։
