Թբիլիսիի միջազգային օդանավակայանում բռնել են օրենքով գող, 1973 թվականին ծնված Սուլիկո Շարիկաձեին։ Նրան բռնել են Թբիլիսիի օդանավակայանում այն օրը, երբ նա Բելառուսից Վրաստան է վերադարձել։
Նրա կողմից կատարված հանցագործությունը 7-10 տարի ազատազրկում է ենթադրում։
«Հետաքննությունը պարզել է, որ մեղադրյալը 1993 թվականից գողական աշխարհում որպես «օրենքով գող է» ճանաչվում։ Նաև պարզվել է, որ վերջին տարիների ընթացքում նա գտնվել է Ռուսաստանի Դաշնությունում և ակտիվորեն մասնակցել է այսպես կոչված «գողական պարզաբանումներին»։ Հետաքննությունն իրականացվում է գողական աշխարհին անդամակցելու փաստով»,– հաղորդել են Վրաստանի ՆԳՆ–ից։
Բացի այդ, ՆԳ նախարարությունը հիշեցնում է, որ գերատեսչությունը օրենսդրական փաթեթ է նախապատրաստել, որը քննարկվում է Վրաստանի խորհրդարանում։ Դրա համաձայն՝ գողական աշխարհին աջակցելը, գողականների հանդիպման կազմակերպումը, գողական աշխարհի անդամին դիմելը համարվելու են հանցագործություն, իսկ գողական աշխարհին անդամակցումը ավելի խիստ է պատժվելու։