«Հանուն Հայաստան պետության» ճակատն առաջնորդվում է իր հռչակագրով, որի ամենաէական խնդիրը սահմանադրականությունն է։ Այդ մասին «Առաջին լրատվական»-ի հետ զրույցում նշեց «Հանուն Հայաստան պետության» ճակատի անդամ Ալեք Ենիգոմշյանը։
Նրա խոսքերով՝ սահմանադրականության ոգին ինքնիշխան, ժողովրդավարական, իրավական ու սոցիալական պետություն ունենալն է։ «Մեր և ժողովրդի իղձը հենց այդպիսի պետություն ունենալն է։ Այսօր ունենք իշխանությունը զավթած և երկրի ինքնիշխանությունն օտարին հանձնած քաղաքատնտեսական շերտ, որը գլխավոր պատճառն է, որ սահմանադրականության նպատակը չիրականացվի։ Իսկ այդ նպատակին հասնելու համար իշխանափոխություն անհրաժեշտ է։ Այսօրվա իշխանությունը միայն մեկ անձով՝ Սերժ Սարգսյանով պայմանավորված չէ, դա համակարգ է, որի պարագլուխը Սերժ Սարգսյանն է։ Այսինքն՝ մենք ավելի գլոբալից գալիս հասնում ենք Սերժ Սարգսյանին, ոչ թե սկսում ու ավարտում ենք Սերժ Սարգսյանով»,-ասաց Ենիգոմշյանը։
Հարցին, թե պատրաստ են արդյոք համագործակցել տարբեր ուժերի, այդ թվում՝ ՀԱԿ-ի հետ, նա արձագանքեց. «Մենք պատրաստ ենք համագործակցել բոլոր այն ուժերի հետ, որոնք 100 տոկոսով կիսում են մեր դրած խնդիրները։ Եթե կան ուժեր, որոնք պատրաստ են համագործակցել մեր դրած խնդիրների 80 տոկոսով, մենք պատրաստ ենք դրան։ Եթե կան ուժեր, որոնք պատրաստ են պայքարել միայն ու բացառապես Սերժ Սարգսյանի վարչապետ դառնալու հավանականությունը բացառելու հարցում, դրան էլ ենք պատրաստ՝ հստակ իմանալով, թե յուրաքանչյուրի հետ համագործակցության եզրերը որտեղ են։ Ցանկացած ուժի, այդ թվում՝ ՀԱԿ-ի հետ համագործակցությունը մեզ չի պարտավորեցնում հրաժարվել մեր սկզբունքային դիրքորոշումներից»։
Ամբողջությամբ՝ տեսանյութում։
