«Ես արդեն լավ եմ, ու եթե վիճակս այսպես պահպանվի, առաջիկայում դուրս կգրվեմ»,- «Առաջին լրատվական»-ի հետ զրույցում ասաց նախկին քաղբանտարկյալ, ԳԽ պատգամավոր Ազատ Արշակյանը։
Նա ասաց, որ բժիշկներին հաջողվել է մի քանի օրվա մեջ իջեցնել իր ճնշումը, շաքարը և առիթմիան։ «Երեք պրոբլեմ կար՝ շաքար, ճնշում և առիթմիա։ Հիմա մի քիչ առիթմիայի վրա են աշխատում։ Աննշան առիթմիա է մնացել»,- հավելեց Արշակյանը՝ կատակելով, որ միայն երիկամների քար չունի, և եթե սրտաբանական հիվանդանոցում քարի հետազոտություն լիներ, բացառված չէ, որ դա էլ ախտորոշվեր իր մոտ։
Ինչ վերաբերում է վիրահատությանը, ապա Արշակյանն ասաց, որ վիրահատության հնարավորությունը 50/50 է, կարելի է և վիրահատել, և չվիրահատել: «Բայց ինչ հնարավոր էր իմ սրտի հետ անել, այս 15 տարվա ընթացքում արվել է, 4 անգամ վիրահատության եմ ենթարկվել։ Ռիսկը մեծ է։ Իմ տարիքում նման վիրահատությունը ռիսկային է։ Ինչ որ պետք է արվի, դա էլ է ռիսկային, վտանգավոր։ Ինձ հիմա բժիշկները ասում են, որ պետք է առողջ ապրելակերպի հետևեմ՝ այգեգործությամբ զբաղվեմ, թոռներիս դպրոց տանեմ ու դասերին հետևեմ։ Մի խոսքով՝ պետք է ապրել և վայելել»,- ասաց մեր զրուցակիցը։
Արշակյանը նշեց, որ արտասահման մեկնել չի ցանկանում, այստեղ կան անհրաժեշտ մասնագետներ։ «Ես ունևոր ընկեր ունեմ, առաջարկում է ուղարկել արտասահման բուժվելու, բայց ես մերժել եմ այդ առաջարկը։ Իմ հայրենիքի հողը ինձ ուժ է տալիս, պահում է ինձ։ Թե չէ 4 անգամ ով է ինֆարկտ տանում և ողջ մնում։ Իմ սիրտը պատկանում է Նորք-Մարաշին»,- կատակեց Արշակյանը։
Ազատ Արշակյանն ասաց, որ ապաքինվելուց հետո պատրաստվում է վերադառնալ իր ակտիվ գործունեությանը, դիտորդի կարգավիճակով հետևելու է նաև Ազատության հրապարակում ծավալվող գործողություններին։
Առավել մանրամասն՝ տեսանյութում:
