Քաղաքական վերլուծաբան Էդգար Վարդանյանի կարծիքով՝ այս պահին բարդ է կանխատեսել՝ արդյոք հասարակությունը և քաղաքական ուժերը կկարողանա՞ն հանրահավաքներով ու փողոցային պայքարի այլ դրսևորումներով կանխել Սերժ Սարգսյանի հնարավոր վարչապետությունը։ «Առաջին լրատվական»-ի հետ զրույցում Վարդանյանն ասաց՝ միջազգային փորձը ցույց է տալիս, որ հնարավոր է լինում շատ կարճ ժամանակահատվածում մոբիլիզացնել հանրությանը, եթե իսկապես կա շատ լուրջ խնդիր, որը հուզում է հանրությանը։
Մեր այն դիտարկմանը, թե կա տեսակետ, որ «գնացքն արդեն գնացել է», և պայքարել պետք էր, երբ սահմանադրական բարեփոխումների հանրաքվե և այնուհետև խորհրդարանական ընտրություններ էին անցկացվում, Վարդանյանն ասաց. «Եթե կա դժգոհություն, և այդ դժգոհությունը վերաբերում է քաղաքական համակարգին, ու այդ դժգոհությունը կրող սուբյեկտներ կան, բնականաբար, եթե ուզում են առաջ գնան, անընդհատ պետք է որոշակի գործողություններ ձեռնարկեն։ Ամեն օր ու յուրաքանչյուր առիթով պետք է փորձեն, որպեսզի իրենց ձայնն էլ հասանելի լինի, ու իրենք ստանան լայն հանրային աջակցություն։ Ես չեմ կարծում, որ ուշ է կամ շուտ՝ յուրաքանչյուր դեպքում պայքարն արդարացված է։ Պետք է նշել, որ խոսքը ոչ բռնի պայքարի մասին է, մեյնսթրիմ ուժերը հայտարարել են, որ կողմ են ոչ բռնի պայքարին»։
Նշեցինք, որ ճակատում կան նաև ռադիկալ տրամադրվածության ուժեր, ինչին ի պատասխան՝ Էդգար Վարդանյանն արձագանքեց. «Սա արդեն լրիվ այլ հարց է։ Կարծում եմ, որ գերիշխողը, ամեն դեպքում, ոչ բռնի պայքարի կողմնակիցներն են։ Իհարկե, սա էլ մեծ նշանակություն ունի մոբիլիզացիայի առումով։ Եթե կա անհստակություն, և եթե հանրությունը տեսնում է, որ այդ ուժերը միակարծիք չեն պայքարի մեթոդոլոգիայի առումով, դա որոշակիորեն զսպում է հանրության ակտիվությունը»։
Հարցազրույցն ամբողջությամբ՝ տեսանյութում: