«Ժառանգություն» կուսակցության վարչության նախագահ Արմեն Մարտիրոսյանը իշխանությանը պաշտպանել է համարում այն, որ «Ելք»-ի որոշ անդամներ շաբաթ օրը տեղի ունեցած հավաքը ատելության քարոզ են որակում։ Արմեն Մարտիրոսյանը հիշեցնում է՝ այդպիսի որակում իշխանությունները տալիս էին 2008-ին, խաղաղ ցուցարարների գործողություններին։
«Եթե իրենք ցանկանում են պաշտպանել իշխանություններին, շատ ավելի ճիշտ է ազատ պաշտպանելը, որևէ խնդիր չկա այդտեղ, իշխանության մեջ տարբեր օղակներ կան, մի օղակն էլ իրենք կարող են լինել, բայց ապատեղեկատվություն տարածել պետք չէ, եթե որևէ քաղաքացի, որևէ ազատամարտիկ ժողովրդական բանահյուսությամբ, էմոցիաներով լեցուն ելույթ է ունենում, պետք չէ դա որոշման տեղ անցկացնել և փորձել ապատեղեկատվություն տարածել։ Իսկ իշխանություններին, եթե պաշտպանում են, որևէ խնդիր չկա, մի ուժ ավելի, մի ուժ պակաս, մի հոգի ավելի, մի հոգի պակաս, որևէ խնդիր չկա»,- շեշտեց նա։
Արմեն Մարտիրոսյանը տեղեկացրեց, որ «Հանուն Հայաստան պետության» ճակատի անդամները հանդիպումներ են ունենում տարբեր քաղաքական գործիչների, ուժերի ներկայացուցիչների հետ, անձամբ ինքը հանդիպել է ՀԱԿ-ից Լևոն Զուրաբյանի հետ, քննարկումները շարունակվելու են, դրանք բացվել են, բայց չեն փակվել։
Անդրադառնալով հարցին՝ արդյո՞ք պաշտպանության նախկին նախարար Սեյրան Օհանյանը կմիանա իրենց, Արմեն Մարտիրոսյանն ասաց, որ չի բացառվում, բայց նրա հետ այս պահին հանդիպում չի եղել։
«Ասածս այն է, որ մենք լայն ենք նայում, իսկապես մասնակցային ենք տեսնում ամեն ինչ, մենք միասնականություն ենք ցանկանում քաղաքացիների ակտիվ մասնակցությամբ, և մենք որոշումների ընդունման հրապարակային մեխանիզմ ենք ուզում»,- շեշտեց նա։
Մանրամասները՝ տեսանյութում։