Գլխավոր դատախազությունը մերժել է Ռոբերտ Քոչարյանին Մարտի 1-ի գործով հարցաքննելու վերաբերյալ «Ելք» խմբակցության պատգամավոր Նիկոլ Փաշինյանի դիմումը: Փաշինյանն այն հիմնավորել էր 2008-ի մարտի 1-ի կեսօրին Ռոբերտ Քոչարյանի արած այն հայտարարությամբ, թե ցուցարարները կրակում են իրավապահների վրա և թաքնվում: Գործի քննությամբ չկա այդպիսի որևէ դրվագ և ապացույց, ըստ այդմ, Փաշինյանը միջնորդում է հարցաքննել Քոչարյանին ու հարցնել, թե ինչի հիման վրա է նա արել իր այդ հայտարարությունը:
Մինչ դատախազությունը կմերժեր միջնորդությունը, Ռոբերտ Քոչարյանի գրասենյակի ղեկավարը Քոչարյանի ոչ պաշտոնական 2rd.am կայքին տված պարզաբանման մեջ Նիկոլ Փաշինյանին էր որակել Մարտի 1-ի կազմակերպիչ, իհարկե բավականին նրբորեն ակնարկելով նաև, որ նրա այդ նախաձեռնության կամ միջնորդության, ընդհանրապես Մարտի 1-ի թեմայի ակտիվացման հետևում Սերժ Սարգսյանն է: Քոչարյանը, իհարկե, ունի այդպես մտածելու հիմք առնվազն այն մասով, որ ՀՀԿ-ն անսպասելիորեն կողմ քվեարկեց գալիք քառօրյա նիստերի օրակարգում Մարտի 1-ի հայտարարության նախագիծ քննարկելու «Ելք»-ի նախաձեռնությանը: Դրանից նույնիսկ «Ելք»-ն էր զարմացել: Իսկ ահա այն, որ դատախազությունը մերժել է Քոչարյանին հարցաքննելու միջնորդությունը, իհարկե, ամենևին զարմանալի չէ: Բանն այն է, որ Մարտի 1-ի, այսպես ասած, իրավական ընթացակարգի հետ կապված ակնկալիքները բացարձակապես մոլորություն կամ ինքնախաբեություն են:
Միևնույն ժամանակ, խնդրո առարկային այս կամ այն կերպ առնչվող իշխանական և քաղաքական սուբյեկտներից որևէ մեկը, ըստ երևույթին, վաղուց որևէ պատրանք չունի այդ կապակցությամբ, և այստեղ, երևի թե, նրանց բոլորի համար էլ թեման փակ է վաղուց: Իսկ ահա Մարտի 1-ի քաղաքական թեման փակ չէ, և թերևս փակ չի մնա շատ երկար ժամանակ: Մարտի 1-ի մասով ընդհանրապես փակ չէ երկու բան՝ մարդկային կորստի վերքը, որ շարունակում է ցավեցնել տասը զոհերի հարազատներին, ընկերներին, բարեկամներին, և Մարտի 1-ի քաղաքական «ամբարը», որտեղ այնպիսի կուտակում է, որ ցանկացած ներքաղաքական սուբյեկտ, լինի իշխանություն, թե ընդդիմություն, ցանկացած պահի կարող է այնտեղ գտնել իր համար անհրաժեշտ որևէ բան: Այդ իմաստով, առջևում հերթական «տոնավաճառն» է այդ թեմայով, որ տեղի կունենա Ազգային ժողովի գալիք քառօրյայում՝ «Ելք»-ի հայտարարության նախագծի քննարկման ժամանակ:
Կասկած չկա, որ ինչպես մերժվեց Քոչարյանին հարցաքննելու միջնորդությունը, նույն կերպ կմերժվի նաև Մարտի 1-ի վերաբերյալ «Ելք»-ի հայտարարությունը: Մեծ հաշվով, այս գործընթացը, անշուշտ, իշխանություն-ընդդիմություն հարաբերության կամ բալանսի տիրույթում չէ, այլ ավելի շուտ իշխանությանը տալիս է իր ներսում խնդիրներ լուծելու, տրամադրություններ շոշափելու հնարավորություն՝ ապրիլի 17-ին ընդառաջ, իսկ «Ելք» դաշինքի համար էլ, թերևս, նշանակություն կունենա ուժերի ներքին բալանսում: Այդ համատեքստում, իհարկե, հետաքրքիր է, թե արդյո՞ք դաշինքը Սերժ Սարգսյանի վարչապետության դեմ պայքարի հրապարակային կամ, այսպես ասած, ոչ հրապարակային մեթոդի կամ ճանապարհի վերաբերյալ իր որոշումը կհասցնի կայացնել մինչև Մարտի 1-ի հայտարարության նախագծի խորհրդարանական քննարկումը, թե՞ կձգվի հարցը մինչ դրանից հետո: Այսօր «Ելք»-ը փորձեց, բայց չկարողացավ կայացնել որևէ որոշում: