Քենթերբերիի արքեպիսկոպոս Ջասթին Վելբին հայտարարել է, որ բուհերում կրթությունը բնակչության համար պետք է անվճար լինի և փոխհատուցվի հարկերի հաշվին։ Նա նաև կոչ է արել բրիտանական եկեղեցիներին՝ բացել դռներն անօթևան քաղաքացիների համար։
Ինչպես գրում է The Guardian-ը, արքեպիսկոպոսը կիսվել է իր հայացքներով ուսանողների հետ հանդիպման ժամանակ։
«Իմ նման մարդիկ, ովքեր չեն վճարել ուսման համար, համալսարանից դուրս են եկել այն զգացումով, որ երկիրն իրենց ինչ որ բան է տվել, իրենց պարտական են զգացել նրա առջև։ Իսկ եթե դուք վճարել եք դրա համար, դուք դա գնել եք, դա ձեզ է պատկանում, ինչու դուք պետք է էլի ինչ որ մեկի մասին հոգ տանեք»,– իր տեսանկյունն է մեկնաբանել արքեպիսկոպոսը։
Նա ուսանողների հետ քննարկել է նաև անօթևանների խնդիրները։ Նրա խոսքերով՝ բրիտանական եկեղեցիները պետք է անվճար օթևան տրամադրեն մարդկանց, ովքեր առանց տանիքի են մնացել։ Ներկայումս բրիտանական եկեղեցիների միայն 5% է որպես գիշերային կացարան գործում։