«Ազատի վիճակում աննշան կայունացում է նկատվում։ Դեռ վտանգ կա, վիրահատությունն էլ հետաձգվել է»,- «Առաջին լրատվական»-ի հետ զրույցում ասաց Ազատ Արշակյանի կինը՝ Անահիտ Արշակյանը՝ անդրադառնալով ամուսնու վիճակին։
Հիշեցնենք, որ երեկ ծանր վիճակում Ազատ Արշակյանը տեղափոխվել է Նորքի սրտաբանական հիվանդանոց։ Նա նախկինում սրտի հետ կապված մի քանի վիրահատության է ենթարկվել։
Այսօր վիրահատություն էր նախատեսված, սակայն կինը մեզ հետ զրույցում ասաց, որ վիրահատությունը հետաձգվել է, քանի որ Արշակյանի սրտի անոթները շատ նուրբ են, երեկ հետազոտման ժամանակ անգամ սրտի կանգ է արձանագրվել, դրա համար բժիշկները զգուշանում են։
«Շատ կարևոր է չշտապելը և ճիշտ քայլեր ձեռնարկելը։ Շատ վտանգավոր իրավիճակ է։ Անգամ մեկ անզգույշ քայլը, գործողությունը կարող է ճակատագրական լինել։ Դրա համար բժիշկները որոշել են սպասել մինչև վիճակը կայունանա»,- ասաց Արշակյանի կինը՝ հավելելով, որ շատ գոհ են բժիշկներից, նրանց մասնագիտական ու մարդկային վերաբերմունքից։ «Անհրաժեշտ մասնագետները կան, բոլորը շատ պատրաստակամ են ու մարդկային»,- ասաց նա։
Արշակյանի կինը նշեց, որ եթե վիրահատությունը տեղի ունենա, ապա միլիոններ են հարկավոր, որը իրենք չունեն։ Երեկվանից հայտարարված հանրային աջակցությանն արձագանքողներ գրեթե չեն եղել։ «Միակ արձագանքողը շարքային մարդիկ են։ Մարդիկ զանգում են, իրենց թոշակից 1000-2000 դրամ են առաջարկում։ Բայց որևէ պաշտոնյայից կամ գործարարից դրամական օգնության որևէ արձագանք չի եղել, որը շատ վիրավորական է Ազատի համար»,- ասաց Անահիտը՝ հավելելով, որ երեկվանից Արշակյանին պաշտոնյաներ էլ չեն այցելել, ոչ էլ իր նախկին կոլեգաները։
«Էլի շարքային, սրտացավ մարդիկ են գալիս այցելության, մտավորականներ, բայց ոչ մի պատգամավոր, պաշտոնյա, գործարար։ Այս վերաբերմունքը Ազատի համար շատ վիրավորական է»,- եզրափակեց կինը։