Արդեն ժամանակն է, որ Թուրքիայի կառավարությունը ճանաչի թուրքական վարչակազմի վարած քաղաքականությունից տուժած ժողովուրդների ցեղասպանությունը: Այս մասին լրագրողների հետ զրույցում հայտարարեց Ալևիների Եվրոպական խորհրդի փոխնախագահ, Ֆրանսիայի կառույցի նախագահ էլդար Քըլչքայան:
«Դրա համար պետք է միավորվեն աշխարհասփյուռ հայերի ու ալևիների և մյուս ժողովուրդների ջանքերը»,-ասաց նա:
էլդար Քըլչքայան հիշեցրեց, որ Հայոց Ցեղասպանության 100-ամյա տարելիցին հրապարակել էին հռչակագիր, իսկ այսօր արդեն պաշտոնական այց են կատարել Երևան, այցելել են Ծիծեռնակաբերդ և հարգանքի տուրք մատուցել հայոց զոհերի հիշատակին, հանդիպել են ԱԺ փոխնախագահ Էդուարդ Շարմազանովի հետ, հանդիպել են նաև ազգային փոքրամասնությունների քուրդ, եզդի, ասորի պատգամավորների հետ, ուսանողների հետ: Նրա խոսքով՝ այս այցի շրջանակում եզրակացրել են, որ ոչ հայերն են ալևիներին բավականաչափ ճանաչում, ոչ էլ ալևիները՝ հայերին, և սա այն դեպքում, երբ հարյուրավոր տարիներ ապրել են կողք կողքի:
«Դարեր շարունակ Անատոլիայի ժողովուրդն ապրել է միևնույն ճակատագրով: Նրանց սնել է նույն հողը, նույն օդն են շնչել. չնայած ալևիների, հայերի, քրդերի, ասորաքաղկենդոնացիների այս ներդաշնակությանը, մշտապես փորձել են ոչնչացնել բազմազանության այս դրսևորումները ամենադաժան մեթոդներով իրականացվող ձուլման քաղաքականության միջոցով: Նրանք խեղդեցին երկիրը արցունքներով ու արյամբ»,-հայտարարության տեքստը ներկայացրեց էլդար Քըլչքայան՝ ընդգծելով, որ այս այցով նրանք վճարում են այն պարտքը, որ ունեն Հրանտ Դինքի և այն հարյուրավոր հայերի հիշատակի առաջ: «Երբ թուրք զինվորները սպանում էին հայերին ու արտաքսում, ալևիները անում էին հնարավորը նրանց օգնելու համար: Մենք նրանց դահիճներին չէինք հանձնում: Բայց դժբախտաբար, մեզ չհաջողվեց փրկել բոլորին և կանխել Հայոց ցեղասպանությունը»,-ասաց նա և հավելեց, որ Հայոց ցեղասպանությունից հետո հաջորդը փաստորեն իրենց հերթն էր:
«Վերադարձ» հիմնադրամի նախագահ, Հայ պառլամենտականների միջազգային ասոցիացիայի անդամ՝ Արագած Ախոյանը հիշեցրեց, որ նախկինում այցելություններ են կատարել Արևմտյան Հայաստան, վարել են հասարակության հետ համագործակցության եզրեր փնտրելու քաղաքականություն, և այդ այցերի շրջանակում առաջին շփումը եղել է հենց ալևիների հետ:
«Սկսեցինք իրականացնել մշակութային ծրագրեր՝ դրանք մեծացնելով դեպի Եվրոպա»,-տեղեկացրեց Արագած Ախոյանը և հավելեց, որ այսօր 2 մլն ալևիներ ապրում են Եվրոպայում, ինչը նշանակում է, որ թուրքական վարչակազմի վարած քաղաքականությունից տուժած ժողովուրդները, փաստորեն, վերագտնում են իրար և փորձում լուծումներ գտնել միասին:
