Ինչպե՞ս է առաջացել ձվի «մատրյոշկան»:
Ավստրալիայի Քեյրի քաղաքի ընտանեկան ֆերմայում անհավանական մեծության ձու է գտնվել: Այն իր մեծությամբ համապատասխանում է հասուն տղամարդու բռունցքի չափերին և կշռում է 176 գրամ:
3000 հավ ունեցող տնտեսությունում նախկինում էլ հայտնվել են 140 գրամ կշռող ձվեր, բայց սա գերազանցել է բոլորին: Հսկայական գտածոն անվանել են «մամոնտի ձու»:
Անսահման է եղել ֆերմեր Սքոթ Սքոթմենի զարմանքը, երբ կոտրելով ձուն՝ ներսում հայտնաբերվել է ևս մեկ ամբողջական ձու:
«Ձուն կոտրելիս մենք հավաքվել էինք բոլոր աշխատակիցներով, սակայն ակնկալում էինք ներսում տեսնել 4 դեղնուց: Մի ձվի մեջ մյուսը իսկապես բնության հազվագյուտ հրաշք է»,- նշել է Սքոթը: