Խորհրդարանն արտահերթ նիստում քննարկում է մի օրինագիծ, որով նախատեսվում է Ազգային անվտանգության ծառայությունն ու ոստիկանությունը դնել վարչապետի ենթակայության ներքո: Այս օրենսդրական նախաձեռնությունը հանրության մի շարք շրջանակներ գնահատում են իբրև Սերժ Սարգսյանի վարչապետության համար պատրաստվող, այսպես ասած, պատվանդան, երբ նրա ենթակայությանն են թողնվում իրավապահ-ուժային երկու առանցքային կառույց, որոնք, փաստորեն, թույլ կտան վարչապետ Սերժ Սարգսյանին վերահսկել ներքին ամբողջ դաշտը:
Ներքին գործերի նախկին նախարար Աշոտ Մանուչարյանի կարծիքով՝ Հայաստանում արդեն վաղուց Սերժ Սարգսյանը ոչինչ չի որոշում։ «Այդ թվում՝ Սերժ Սարգսյանը չի որոշում, թե ինքը որտեղ կլինի, և ինչ օրենք է պետք։ Ես համոզված եմ, որ եթե Սերժ Սարգսյանին թողնեին՝ նա ընդունված փաստաթղթերից շատ-շատերը չէր էլ ընդունի, օրինակ, ընտանեկան բռնության հետ կապված խնդիրը։ Ինչքան էլ ասում ենք՝ Սերժ Սարգսյանը բարոյականությունը կորցրած մարդ է՝ ոչ այն աստիճանի, որ գնար այդ օրենքների ընդունմանը։ Հետևաբար՝ իրենից դուրս է այս ամենը որոշվում, և չի կարելի մտածել, որ նա իր համար է ստեղծում։ Եթե ապրիլի 9-ին գա որոշում, որ նա մնալու է այդ տեղում՝ կմնա, եթե եկավ որոշում, որ չի մնալու՝ չի մնա»,- «Առաջին լրատվական»-ի հետ զրույցում ասաց Մանուչարյանը։
Մեր այն դիտարկմանը, թե ՀՀԿ-ականներն այս օրերին հայտարարում են, որ իրենք են որոշելու՝ ով դառնա վարչապետ, և Սերժ Սարգսյանն ընդամենը կուսակցական է, որ պետք է ենթարկվի կուսակցության որոշմանը, Աշոտ Մանուչարյանն արձագանքեց. «Վաղը այդ նույն Հանրապետականը սկսելու է գոռալ, որ ավելի կատարյալ վարչապետ, քան Կարեն Կարապետյանը՝ աշխարհը չի տեսել, և ժամանակն է, որ Սերժ Սարգսյանը գնա պատվավոր հանգստի։ Սերժ Սարգսյանը չի որոշելու խաղը՝ նշանակում է հետևյալը. իրենք ձևացնում են, որ իրենք աշխարհում ինչ-որ բան են որոշում։ Բայց իրենք չեն որոշում նույնիսկ, թե այսօր ճաշին ինչ են ուտելու, եթե Սերժ Սարգսյանն ասաց, որ այսօր գնալու ենք ժենգյալով հաց ուտենք՝ իրենք ժենգյալով հաց կուտեն»։
Հարցազրույցն ամբողջությամբ՝ տեսանյութում։