Մայրաքաղաքի կենտրոնում զբոսաշրջիկների համար տեղեկատվական կենտրոններ կբացվեն: Լրագրողների հետ հանդիպմանն այս մասին տեղեկացրել է Երևանի քաղաքապետարանի աշխատակազմի տուրիզմի բաժնի պետ Գևորգ Օրբելյանը:
Նրա խոսքով` տեղեկատվական կենտրոնները կօգնեն մայրաքաղաքի հյուրերին կողմնորոշվել Երեւանում, ինչպես նաեւ տեղեկատվություն կտան, թե ինչպես զբոսաշրջիկը կարող է իր ժամանցն անցկացնել Երեւանից դուրս: «Դեռ մեկը կբացվի, բայց տարվա ընթացքում դրանց թիվը կավելանա: Տեղեկատվական կենտրոններ կգործեն Հյուսիսային պողոտայում, Վերնիսաժի տարածքում»,-ասաց նա:
Անդրադառնալով կանանց միամսյակին նվիրված միջոցառումներին՝ Երեւանի քաղաքապետարանի տուրիզմի բաժնի պետն ասաց, որ դրանք կմեկնարկեն մարտի 8-ին եւ կտեւեն մինչեւ ապրիլի 7-ը: «Մենք մի գեղեցիկ ավանդույթ ունենք: Օդանավակայանում մարտի 8-ին Երեւան ժամանող կանանց նվիրում ենք բացիկներ, ծաղիկներ: Տոնական անակնկալները կշարունակվեն նաեւ մայրաքաղաքի տարբեր վարչական շրջաններում»,-հավելեց Օրբելյանը:
