Ազգային ժողովի փոխնախագահ, Հայաստան-ԱՄՆ բարեկամական խմբի ղեկավար Արփինե Հովհաննիսյանի գլխավորած պատվիրակությունը, որի կազմում են Ազգային ժողովի պատգամավորներ Արմեն Աշոտյանը, Նաիրա Զոհրաբյանը, Էդմոն Մարուքյանը և Աղվան Վարդանյանը, աշխատանքային այցով այսօր մեկնել է Ամերիկայի Միացյալ Նահանգներ:
Այս այցն ուշագրավ է մի քանի ասպեկտով: Նախ` Հայաստանն անցում է կատարում կառավարման նոր համակարգին, ըստ այդմ` մեր երկրի արտաքին քաղաքականությունը դառնում է ավելի բազմաշերտ` հատուկ նշանակություն վերապահելով խորհրդարանական դիվանագիտությանը: Դա հատկապես կարևոր է հայ-ամերիկյան հարաբերությունների համատեքստում, մանավանդ, որ դեռ անցյալ տարի Կոնգրեսը` օրենսդրական շտկումների միջոցով, էապես մեծացրել է իր դերակատարությունն արտաքին քաղաքականության հարցերում` ի հաշիվ էպատաժային նախագահ Դոնալդ Թրամփի:
Սակայն ավելի էական է խնդրի բովանդակային կողմը. հայ-ամերիկյան հարաբերություններն այսօր, ըստ էության, չունեն քաղաքական բաղադրիչ: Երեկ «Առաջին լրատվական»-ին տված հարցազրույցում Հայաստանում ԱՄՆ դեսպան Ռիչարդ Միլսը, ըստ էության, նշել էր այն առաջնահերթությունները, որոնք Վաշինգտոնը ձևակերպել է Հայաստանի հետ հարաբերություններում` ժողովրդավարություն, կոռուպցիայի դեմ պայքար, Հայաստանի ինքնիշխանության ամրապնդում և այլն: Կոնգրեսի կամ ԱՄՆ գործադիր իշխանության ուղղությամբ հայկական ջանքերը մինչև հիմա կենտրոնացել են Ցեղասպանության ճանաչման, առավելագույնը` ԼՂ խնդիրների վրա: Այս օրակարգն ակնհայտորեն հնացած է և չի սպասարկում այն կենսական խնդիրների լուծմանը, որոնք ծառացած են Հայաստանի առջև: Ժամանակն է գիտակցել, որ պետության հիմնական առաքելությունը ոչ թե պատմական արդարության վերականգնումն է, այլ` իր քաղաքացիների անվտանգությունն ու բարեկեցությունն ապահովելը:
Ինչքան անկեղծ և բաց լինի հայկական պատվիրակությունը ցավոտ խնդիրների քննարկման հարցում, այնքան մեծ է լինելու հայ-ամերիկյան օրակարգի, փոխադարձ հետաքրքրություն ունեցող հարցերի ձևավորման հնարավորությունը: Ի վերջո, ակնհայտ է, որ Վաշինգտոնում սպասում են Հայաստանի առաջարկություններին` գնահատելու համար ինքնիշխան որոշումներ կայացնելու Երևանի պոտենցիալը, ռեսուրսները: Այս համատեքստում խիստ էական է, թե ի՞նչ ուղերձով է հայկական պատվիրակությունը մեկնել Վաշինգտոն
Մյուս կողմից` ակնհայտ ինստիտուցիոնալ և բովանդակային ճգնաժամ է առաջացել նաև Հայաստանի և Սփյուռքի հարաբերություններում. պետությունը չի ուզում կամ չի կարողանում բանաձևեր առաջարկել համահայկական օրակարգի ձևավորման համար, Սփյուռքի կառուցները, օբյեկտիվ և սուբյեկտիվ պատճառներով, չունեն ռազմավարական նման խնդիր ձևակերպելու պոտենցիալ: Այստեղ խնդիրը դարձյալ մեր ավանդական կարծրատիպերն են, պետական մտածողության, քաղաքական ռացիոնալ բանաձևերի բացակայությունը: Տասնամյակներ շարունակ համազգային միասնության հիմքում եղել է, ըստ էության, հակաթուրքականությունը: Մենք պետք է կարողանանք հաղթահարել այդ բարդույթը, աշխարհին ներկայանանք ոչ թե մեր ողբերգական պատմությամբ, այլ քաղաքակրթական հետագծով, ռացիոնալ և համաշխարհային համատեքստին համահունչ օրակարգով:
ԱՄՆ մեկնած խորհրդարանական պատվիրակությունը հանդիպումներ է ունենալու նաև Սփյուռքի կառույցների հետ. մնում է հուսալ, որ դրանք կանցկացվեն ոչ թե հնացած օրակարգերի, այլ ապագայի տեսլականի համատեքստում: